Gugma nga makabuang

Gula 6

Wala makasabot si Lino sa iyang gibati karon nga nahanaw na kaniya ang duha niya ka girlfriends. Luhaan pa ang mga mata ni Lino nga milakaw paghinay gawas sa Plaza Independencia.

Luya kaayo nga milakaw si Lino paingon sa imnanan sa dalan Legaspi nga gitrabahoan ni Hazel kaniadto. Gusto ni Lino nga hubgon ang iyang kaugalingon sa pamasin nga iyang makalimtan ang masakit niya nga kasinatian bisan sa hamubo na lang nga higayon.Miorder dayon si Lino og tulo ka botelya nga beer.  Gitungab dayon niya ang usa ka botelya ug wala lung-i pag-inom hangtod nga nahurot ang sulod. Gipiyong ni Lino ang iyang mga mata.

“Kapaspas gud nimo nga miinom og beer Sir?” matud sa usa ka promo girl nga nag-inusara’ng naglingkod sa pikas lamesa. Wala motingog si Lino. Dunay pipila ka kustomer nga nag-inom sa unahan nga lamesa.

Gitungab na usab ni Lino ang ikaduha’ng botelya. Gusto g’yud niya nga lumsan dayon ang iyang kaugalingon sa ilimnong makahubog. Nakita ni Lino nga ang babaye nga kauban sa mga lalaki nga kustomer sa unahan miduol sa videoke ug mi-encode og kanta.

Wala madugay, mitugtog na ang videoke. Daw gisungog g’yud si Lino kay ang awit ni Eva Eugenio nga “Ano ang Gagawin Kapa’g Wala Ka Na” maoy gikanta sa babaye. Miduko sa Lino ug gipiyong ang mga mata.

Gisabot pag-ayo ni Lino ang mga lyrics sa awit ug takulahaw lang nanaligdig sa iyang kaapingan ang iyang mga luha. Igo kaayo si Lino sa lyrics sa awit “Ang buhay ko pala ay wala nang halaga, kung iiwanan mo’ng nag-iisa.”             Gitabonan ni Lino ang iyang nawong sa panyo aron dili makita nga siya naghilak. Taud-taud, misuliyaw ang mga promo girl sa tindahan. “Day!! Kumusta ka na man? Tan-awa sa pikas lamesa day,” tingog sa kahera ang nadungog ni Lino.

Miyangad si Lino aron pagtan-aw kun ngano nga nangalipay ang mga promo girl. Misugat sa iyang panan-aw ang panagway ni Hazel. (Sumpayan)