Gugma nga makabuang - Gula 3

Gitangdo ni Lino si Nympha nga magkita sila inig-gawas niya sa trabaho. Nahuna-huna ni Lino nga tukma usab, dad-on na usab niya si Nympha sa kinaham nila nga motel sa Barangay Carreta. Tuod, paggawas ni Lino gikan sa iyang opisina nianang pagkahapon, diretso siya nga nag-atang og kasakyan paingon sa Plaza Independencia nga maoy dapit nga giingon ni Nympha kaniya.

May nagdanga-danga nga taksi, gipara kini ni Lino. Sa atubangan sa Fort San Pedro gipahunong ni Lino ang taxi. Gituyo niya kay aron iyang maaninaw daan kun asa nagpaabot kaniya si Nympha. Sinati na niya ang bayhon sa dalaga.

Nalantawan dayon niya si Nympha nga naglingkod sa dako’ng punoan sa kahoy’ng Balete ug naglantaw kini sa talisawop nga adlaw. Wala kini makabantay nga nagdanga-danga na si Lino sa iyang nahimutangan.

Diha na sa iyang luyo si Lino. Gipanid-an lang usa ni Lino si Nympha, mora’g may lawom kini nga gihuna-huna. Gipunting ni Lino ang iyang panan-aw sa porma kaayo nga hawak ug bat-ang ni Nympha. Misamot ang kaikag ni Lino nga isulod niya’g motel ang iyang girlfriend niini karong ilang panagkita.

Taud-taud na sila nga wala na makasulod og motel kay didto natingob ang iyang pagtagad kaniadto ni Hazel. “Kaganina ka ra diay Nymph?” timbaya ni Lino sa dalaga. Milingi si Nympha kang Lino dala ang daw hilaw nga pahiyom. Mitupad si Lino sa paglingkod sa dalaga dungan ang pag-agbay niini. Apan gigunitan ni Nympha ang iyang kamot ug gikuha gikan sa iyang abaga.

“Gimingaw na kaayo ko nimo Nymph,” matud ni Lino. Wala motingog ang dalaga. Gipunting niini ang iyang panan-aw sa nagkasawop nga adlaw.

“Mora’g may problema ka,” gisukna ni Lino ang iyang girlfriend. “Yes, dugay ra unta ko nga gusto’ng makigkita nimo. May nailhan ka ba nga Hazel?” mibawos pagsukna si Nympha kang Lino. Ingon sa natuk-an ang ulitawo, wala katingog. (Sumpayan)