Nganong wala bagduki
Daw sa nagdilaab ang kainit sa adlaw, apan wala kini igsapayan ni George, alang kaniya importante nga aduna siyay madalang kwarta alang sa ilang panginahanglanon. Aduna siya’y tulo ka buok nga anak sa iyang asawang si Shien.
Ug kini mao silang Ryan, Aireen, ug Shiera. Udtong tutok nakahukom si George nga mo half-day na lang sa pagpamasada. Naglain man gyud ang iyang lawas. Dili man tuod dako ang iyang kinitaan niadtong higayuna apan igo na kining ipalit og bugas sa tindahan ni Manong Kenan nga iya usab nga suod nga higala.
“Diay singkwenta pesos pagpalit ngadto’g bugas aron atong malung-ag,” ni George pa ngadto sa iyang asawa.
Samtang nagbaktas si Shien sa dalan paingon sa tindahan ni Nong Kenan, nasugatan niini si Nang Louwella nga mangisyuhay og masiao (masyaw).
“Di ka mopatad day?” sukna pa ni nang Louwella ngadto ni Shien.
Nakahinumdom si Shien sa numerong 389 nga iyang nadamgohan. Ug diha-diha sa walay pagduha-duha nipatad si Shien, gi-ibanan niya ang singkwenta pesos nga igpapalit og bugas nga malung-ag.
Sa paghiabot niya sa balay hilabihang sukoa sa bana niini.
“Sugarol gyud kang bayhana ka! wala man gani ko mipalit og tambal ... gipalit na nuon nimo’g masiao!” singhag pa ni George sa iyang asawa dayo’g tamparos niini.
Hilabihang kasuko ug kayugot ang nabatyagan ni George ngadto sa iyang asawa nga imbes usa ka kilo nga bugas ang gipapalit niini nipalit naman kini’g tunga sa kilo. Gipalit man niini ang diyes pesos og masiao ang kinse pesos gipalit man niini’g sabon panlaban. Nadapatan gayud ni George ang iyang asawa.
Pagka-ugma niana nahipugwat sila sa ilang pagkatulog tungod sa singgit ni Nang Louwella.
“Dayyy!!!! .... Shiiieennn ....!.... Day!!! ... mata na ... “nidaog ka oyyyy!.... migula ang numero mong 389!” matud pa ni Nang Louwella samtang nagsinggit.
Ug sa pagdawat ni Shien sa iyang daug ... sa unsang pagkaunsaa sa iyang bana nga imbes malipay kini nasuko naman hinuon kini.
Gitamparos na pud siya niini ug namulong “nganong wala man nimo bagduki!!!” Ug igo na lang intawon sa pagpatulo sa iyang luha si Shien nga naglagot sa yabagon niyang bana. (Katapusan)
- Latest
