Reinkarnasyon

Sa sulod sa SM Mall sa North Reclamation Area, nagbutokbutok ang dughan ni Henry nga kaganiha rang nagtutok sa babaye nga namili og rayban sa sulod sa usa ka optical clinic.

“Amy....!” sangpit ni Henry sa babaye nga milingi ug nahikurat usab nga mitutok kaniya. “Ra-ffy! Raffy!” tubag usab sa guwapang babaye nga mitutok pag-ayo kang Henry. “D-dili Amy ang ngalan ko! Ako si Evelyn...!”

“D-dili sab Raffy ang ngalan ko! Ako si Henry, Eve! Sus, kamay-ong man gyud ka’g dagway sa uyab ko nga namatay sa leukemia...!” “Abi sab nako og si Raffy ka, Hen, ang uyab nako nga namatay sa aksidente sa motorsiklo niyang gidrayban. Kamay-ong gyud mo’g dagway si Raffy, Hen...!” “Kun mao, tinuod gayud diay nga dunay reinkarnasyon, Eve! Ikaw ang reinkarnasyon sa namatay kong uyab nga si Amy....!” “Ug ikaw sab ang reinkarnasyon sa uyab kong si Raffy, Hen! Yes, motuo gyud ko’g reinkarnasyon! Bisan karon pa ta magkita, apan mora’g dugay na ta nga nagkasuod, Hen...!”

“Syempre! Reinkarnasyon gud tang duha sa tagsatagsa ta ka uyab nga namatay na. Pwede bang mag-lunch tang duha, Eve, aron magka-estoryahay ta’g maayo...?” “Sure! Invitation accepted, Hen....!” Ug sa sulod sa Chowking sa SM Mall, nagdungan sa pagpaniudto sila si Henry ug Evelyn. “CPA diay ka, Eve? Parehas gyud diay mo’g propesyon ni anhing Amy!” “Hala ka, Hen! Sama nimo, usa usab ka lisensiyadong civil engineer si anhing Raffy! Reinkarnasyon gyud ning nahitabo natong duha...!”

“Wa pa ba kay boyfriend nga gipuli mo ni anhing Raffy, Eve...?”

“Wa pa gyud, Hen, uy! Ikaw, duna na ba kay gipuli kang anhing Amy?” “Duna na,Eve! Ug siya mao ikaw, kun mosugot ka...!”

“Kinsa bay makabalibad sa tanyag mo, Hen! Reinkarnasyon gud ka ni anhing Raffy. Nabuhi pag-usab ang akong gugma ngadto sa usa ka lalake!” “Dili matukib ang gibati kong kalipay karon, Eve! Gusto kong sultihan dayon ang tagsatagsa ta ka parents sa atong pagpakasal...!”

“Mahibulong gyud ang atong mga parents, Hen, inigkakita natong duha, nga buhi diay’ng ako...!”

“Lakip ang atong kaparyentihan ug kahigalaan, mobati sab og kahibulong nga mora’g nabanhaw tang duha, Eve....!”

Mahinamon nga may gihunghong si Henry kang Evelyn. Nangatawa silang duha. Ug human sa ilang paniudto, abtik silang nanggawas sa kan-anan, aron tumanon ang ilang gikasabotan nga motsik-in sa usa ka motel.

Ang epekto sa reinkarnasyon tali kanilang duha maoy mipahumok sa ilang mga kasingkasing nga lisod kabalibaran. (Kataposan)