Motto ni Lolo

Fiona, ayaw kabalaka nako, Inday. Nasayod na ka’s akong motto sa kinabuhi” ni Lolo Nardo.

Nagkurog ang iyang tingog nga nihigda sa sopa. Nibukot og habol. Nisugod og kanta og mga religious songs nga gipasikat ni Rico Puno. Nabalaka gyud kong lolo kay gitakigan ug giubo. Nag-uwan man god ganihang sayong hapon pagkuha niya nako sa eskuylahan. Grade 3 man ko sa SDA Elementary School. Nia mi pauli sa giabangan nilang lola nga balay sa Banawa.

Akong lola Nena gihutoy sab ug namugnaw ug kasamtangan siyang gihilot ug gimasahean ni Lenlen, ilang maid. Lawak ra man ang ilang giabangan. Apeke ang lugar. Usa ray katre nga maoy gihigdaan ni lola samtang gihilot.

Nia man ko ipon sa akong mga apohan nga retiradong magtutudlo. Sila  ang nagpatungha nako sukad sa Nursery, Kindergarten ug hangtud karon tungod kay nagbuwag ang akong papa’g mama. Tagsa ra sila moduaw nako. Akong apohan ginikanan ni Mama Maricor.

Hatud kuha ko’s akong lolo sa eskuylahan. Pero usa ka semana na siyang giubo. Usahay hilantan. Karon, igo lang nanihapon si lolo bisa’g way gana. Unya nihigda dayon. Nabalaka unta ko. Apan wa man koy mahimo. Igo na lang ko nag-pray para nila. Magpanglingi ko nila samtang nagbuhat sa akong assignments.

Matud ni lolo nga hapit balikbalik sa iyang pagsulti nako:

“I am happy and contented with my life. I already thanked God for my life and everything. I thanked him for my life everyday when I wake up. I can die anytime since I retired. I am not afraid to die. Because fear of death is cause of death. Ang akong motto sa kinabuhi, I want to die happy, laughing, smiling or singing. Busa, bisa’g unsa pay akong balatian, ikanta ko na lang!”

Gitinood ni lolo  ang pagkanta. Naghigda siya. Nagpiyong. Pero nagkanta. Dangtag duha ka oras, nahilom si lolo. Gikulbaan ko. Giduol nako. Nadungog nako ang iyang hinay’ng hagok. Nahunong ang iyang ubo. Gihikap nako iyang liog. Niubos iyang kainit.

“Thank you, Lord for healing my lolo” hilom kong pasalamat sa Diyos. Ug giampo sab nako akong lola. Nahinanok na sab hinoon siya human sa hilot ug masahe. (Katapusan)