Abogado nga gihusgahan

Paghuman og pangalawat ni Vina, nilakang dayon siya balik sa iyang gilingkuran sulod sa simbahan. Samtang naglakaw, hapit siya kapangyamiid ni Atty. Primo Datolid nga naglingkod lang sa lingkuranan di layo sa luyo niya.

Panahon ron sa pangalawat sa alas otso nga buntagon nga misa sa Domingo. Ang asawa ra ni Primo ang nangalawat. Kaila si Vina sa abogado kay ang inahan ni Vina nga si Venancia, kliyente sa manlalaban. Dunay lima ka abogado sa ilang lungsod sa Pensando. Bisan usa sa upat, wa gyud kakita si Vina nga nisimba. Si Primo ra gyud ang nisimba. Pero, di mangalawat. “Makasasala gyud tingale! Bakakon man gud ang mga abogado”? sa hunahuna ni Vina. “Tingale sab, under de saya. Basi’g way ganang mosimba, apan napugos la’g kuyog sa asawa. Kay mahadlok og ma-outside de kolambo,” dugang nga hilom nga tuaw sa dalaga.

“Kumusta na man diay imong kaso, Ma?” sukot ni Vina ngadto’s iyang inahan paghiuli niya human sa misa. Nakapalit og yuta si Venancia, nga nisunod sa iyang napalitan. Kay barato ang presyo, gipalit niya. Unya naburoka. Kay duna diay usa ka manununod nga wa kaapil sa pagsunod. Wa sab kadawat og bahin sa halin. Gikiha ang nagbaligya lakip si Venancia. “Naareglo na man” ni Venancia. “Pila may bayad nimo sa areglo?” “P100,000.” “Dakoa gud!”

“Dili na dako, anak.Para nako, barato ra. Kay balor na ma’g tres milyones ang yuta.” “Unya. Pilay gibayad nimo ni Atty. Datolid?” “Wa siya nagpabayad”.  “Ha!?’ nakapanap-ong sa baba si Vina.

“Tinuod ka?” dugang sa dalaga.

“Giutang man lang gud nako iyang acceptance fee ug appearance fee. Iyang kwenta-kwenta, niabot na og P50,000. Unya nisugyot ang huwes nga areglohon ang kaso. Nisugot ang kihante nga modawat lang og P100,000. Giingnan ko ni Atty. Primo nga bayran na lang nako. Ug aron ko kaminus, itampo niya ang P50,000 nga para niya” ni Venancia. Mapahiyomon.

Nahilom si Vina. Naulaw sa iyang kaugalingon. Hilom siyang nagbasol sa iyang paghusga sa abogado. “Nganong nakapangutana ka man, anak?” ni Venancia. “Ah, eh. Nagkita man gud mi sa simbahan. Ug nangumusta siya nimo” ni Vina. “Kun mahalin nang yutaa anak, una si attorney nga hatagan nako’g barato” ni Venancia. “Angay lang sab, Ma” ni Venancia. Mapahiyomon nga nisulod sa iyang lawak. (Katapusan)