Nasakpan - Gula 3

Human makailis sa iyang sapot, mibalik dayon si Dave sa giparkingan sa sakyanan ni Cherry nga iyang asawa. Wala na didto si Cherry kay misulod na kini sa balay.

Gisiguro ni Dave nga makit-an dayon niya si Cherry kun mogawas kini sa balay ug moduol kini sa iyang awto. Gigisian niya’g gamay ang sidsid nga bahin sa seat cover sa driver’s seat. Gikuot dayon ni Dave ang gamay’ng voice recorder gikan sa iyang bulsa ug mainampingon niya kini nga gipasok sa gigisi niya nga sidsid sa seatcover. Husto g’yud kaayo nga dili kini makita.

Nagpasiklap si Dave sa pultahan sa ilang balay. Karon, gi-switch on na ni Dave ang voice recorder ug gipasok dayon niya sa gigisi nga bahin sa seat cover. Tulo ka adlaw nga magsige kini og kuha’g mga tingog.

Gi-adjust na ni Dave ang rekorder aron mohunong kini sa pag-record kun mingaw ang palibot. Sa ato pa, kun walay tawo ang awto dili usab mo-record ang mao nga recorder. Tumong ni Dave nga mapanid-an niya ang mga lakaw sa iyang asawa. Maayo kaayo nga pagkatago ni Dave ang mini-recorder nga mora lang og maguwang sa ballpen ang gidak-on. Nasiplatan ni Dave si Cherry nga migawas sa balay ug nagpaingon sa giparkingan sa kotse.

“Oki na ba Dave kay may lakwon ko kadiyot. Paadtuon ko ni Mommy kadiyot. Ikaw na la’y panihapon may giandam na ko nga pagkaon,” matud ni Cherry. Nagpasumangil si Dave nga mihugot sa roska sa lingkoranan apan wala motubag sa gisulti sa asawa.

Kuwang siya og pagtuo nga adto sa balay sa iyang Mommy ang rumbo niini karong taud-taud. Igo lang sa pagpangagho si Dave. Milingkod si Dave sa lingkoranan aron masuwayan kun dili na ba moigot ang sandiganan.

Hugot na g’yud. Gisirad-an niya ang duha ka pultahan. Gisuwayan pagbukas ni Dave ang drawer sulod sa sakyanan, apan lock. Nakahuna-huna siya nga buksan kay anaa man kaniya ang yawe. Tuod, nabuksan na.

Napasiga ang mga mata ni Dave kay kagamitan sa lalaki ang diha sa sulod ug may hulagway pa sa lalaki. Dali nga gisirad-an ni Dave ang drawer kay nalantawan niya nga migawas na si Cherry gikan sa balay nga nakailis na. “Maayo na kana,” matud ni Dave ug dayong biya. (Sumpayan)