Ayaw og dagan
Nangita si Chito og laing lugar diin mag-ilis siya og t-shirt. Ang naandan niyang lugar, lantay nga kawayan daplin sa karsada ubos sa dakong punoan sa Lomboy, dunay babaye’g lalaki nga nanglingkod. Di siya gusto makaistorbo og tawo. Mohatag siya’g privacy sa isig ka tawo. Busa, gisayloan niya ang maong lantay. Nipadayon siya’g lakaw balik sa iyang agi.
Alas singko i mediya sa buntag iyang paggikan sa Poblasyon, Carmen diin tua iyahang balay. Kun nia siya’s Carmen (kasagaran weekends o holidays, sama karon nga Biyernes Santo) mag-hike gyud siya kada buntag. Iyang finish line, kilometer 44 sa Puente, Carmen, Cebu. Unya mobalik siya sa agi.
Natumog na sa singot iyang gisul-ob nga T-shirt. Duna siya’y dalang laing T-shirt nga gilukot pagputos sa iyang toong kamot. Nilingkod siya sa usa ka bakanteng lingkuranan sa sirado nga tindahan atbang sa Hillside Manokan.
Gitangtang niya ang iyang kawo ug gibutang sa iyang tupad sa wala. Gitangtang niya iyang shade ug gipatong sa kawo. Gihukas niya iyang basang T-shirt nga asul.
Samtang nag-ilis siya, may niduol nga iro nga itom ug kibul. Gisimhotsimhot sa iro iyang mga tiil ug bitiis. Wa magtingog ang iro. Way paghot. Way ngulob. Pero, gibati’g kahadlok si Chito. Kay bangis og hitsura ang iro. Unya sa istorya pa, ang irong mopaghot, dili mamaak. Kini kay wa nipaghot, bali!
Apan nipadayon lang siya’s iyang gibuhat. Wa niya tagda ang iro. Nahinumdom sab siya’s gamay pa siya. Nga ang mga tag-iya’s iro, moingon gyud sa mga tawo nga paghoton sa ilang iro “Ayaw og dagan!”.
Wa na lang siya maglihok paghuman og ilis. Nibiya ra sab ang iro paghuman niya’g simhot. Sa animal pscyhology, nga nasabut ni Chito, gusto lang makaila ang iro niya. Maong gisimhot siya. Pero nakaginhawa gihapon siya’g lawom pagbiya sa iro. (Katapusan)
- Latest
