Beauty Queen - Gula 7

Wala danti’g oras, naabot sa Daanbantayan ang magbarkada nga sila si Emerson ug Ronnie, uban ni Beth. “Nindot man diay kaayo ang inyo’ng lugar Mer, daplin man diay og dagat ang inyong balay,” ni Beth nga milantaw sa daw nagpangamay nga dagat.

“Mangaligo ta karon. Basta mouli ko dinhi sa probinsya dili g’yud nako sipyaton ang pagkaligo sa dagat,” matud ni Emerson. Gipahuwam si Beth og short pants sa igsuong babaye ni Emerson.

Nagtubod ang laway ni Emerson nga nagsud-ong sa puti kaayo nga paa ni Beth samtang nag-short pants. Nakabantay si Beth nga kanunay’ng mopasiklap si Emerson sa iyang paa.

“Dili diay mosugat nimo ang imong girlfriend Mer kun mouli ka?” gisukna ni Beth ang iyang higala. Abtik kaayo nga nakatubag si Emerson. “Sama nimo Beth, wala ko’y girlfriend dinhi, didto sa siyudad duna unta, apan nagkabuwag na mi.”

Misamot ang kasuod sa duha. Nagtaob ang dagat ug nag-anam kalawom. Si Ronnie lingaw usab kaayo nga nakigsandurot sa mga babaye nga barkada sa manghod ni Emerson. Mipahuway sila si Emerson ug Beth didto sa ilawom sa kahoy’ng pagatpat.

“Lipay kaayo ko nga nagkaila ta Mer kay sa pag-uli nako dinhi sa probinsya wala damha nga nakapangaligo pa g’yud ko sa dagat,” matud ni Beth nga nagpahiyom. “Ako ‘sab, lingaw kaayo kay sa pag-uli nako sa probinsya, nakapamista ug nakaila pa g’yud tika Beth,” abtik nga tubag ni Emerson.

Gisakyan dayon ni Emerson ang sitwasyon. “Swerte kaayo ko Beth nga nakauban ka nako, usa ka maanyag nga beauty queen. Kanindot unta kun ako ka pa’ng girlfriend uy,” pasumbingay ni Emerson sa dalaga.

Nakapahiyom si Beth nga nakadungog. Gi follow-up dayon ni Emerson ang pagpakahilom sa dalaga. “Dili ka ba masuko kun manguyab ko nimo?” Mipahiyom pag-usab si Beth ug miatubang sa ulitawo. “Pwede pero, ipaagi sa balak ang pagpanguyab.”

Nagkataw-anay ang duha. “I love you Beth,” matud ni Emerson dungan ang paggunit sa kamot sa dalaga ug iya kini’ng gipig-it samtang ilawom sa tubig. Mitutok ni Emerson si Beth nga nagpahiyom.

“Lisod kaayo nga balibaran ang usa ka magbabalak. I love you too Mer,” matud ni Beth nga mibawos pagpislit sa kamot ni Emerson. Hapon na sila nga namalik sa ilang dapit ni Beth sa Barangay Binabag ug natingala na lang si Ronnie kay migakos na man kang Emerson si Beth samtang nag-angkas kini sa motorsiklo. (Kataposan)