Beauty Queen

“Pamista usa mo Mer dinhi sa amo aron mosamot kaalegre ang among pista ugma,” giingnan ni Elizabeth si Emerson. Mipahiyom si Merson apan nagpanuko siya pagtangdo. “Ang problema kay ikaw ra ang among amiga dinhi. Dili ka man ‘sab namo ikauban kanunay kay adto ka man g’yud sa imong boyfriend,” hinay nga mga pulong sa ulitawo.

“Uy simbako, wala ko’y boyfriend dinhi sa baryo kay tua man ko kanunay sa siyudad nag-eskuwela. Sigi na Mer para kita ang magkuyog-kuyog ugma,” matud ni Beth sa tingog nga hilabihan ka paraygon.

Wala gayud makabalibad si Emerson sa pagdapit ni Beth kaniya. Hilabihan ang kalipay sa beauty queen nga wala siya balibari sa ulitawo. “Tiyo, misugot na si Emerson nga akong gidapit nga mamista sa ato ug dili lang usa mobiya,” giingnan ni Beth ang kapitan sa barangay.

Tuod, sa balay sa kapitan miestar sila si Emerson ug Ronnie nianang gabhiona. Pagka buntag sayo, gibisitahan sila ni Beth. Diha na g’yud nasuta ni Emerson ang kaanyag ni Elizabeth ug natataw pa niya ang kandiis sa dalaga sa duha niya ka aping.

May nahuna-hunaan si Emerson. “Hain ang maayo Beth kun molahos una mi sa Daanbantayan aron bisitahan nako ang akong mga ginikanan didto. Mobalik lamang mi dinhi sa gabii na,” giingnan ni Merson si Beth.

“Ah mangilad na ‘sab ay. Dili na g’yud mo mobalik,” sa dalaga pa. Naglisod si Merson kay mora’g dili sila tugtan ni Beth. “Sige, ang maayo kuyog ta sa amo Beth, may kahuwaman ba ta nga motor nga atong magamit?” matud ni Merson.

Nahinangop si Beth kay sukad-sukad wala pa gayud siya makaadto sa Daanbantayan. “May motor si tiyo, akong huwaman. Unya dili man ko kamao mo-drive?” ni Beth pa. “Ako ang mo-drive sa motor sa imong tiyo, angkas ka nako, unya si Ronnie sa among motor,” pasabot ni Merson.

Wala magmakuli ang kapitan sa barangay pagpagamit sa iyang motor. “Sige, ayo-ayo mo dong, balik baya mo sa dili pa mogabii ha kay magpaabot mi.” Nag-una si Merson ug nagsunod kanila si Ronnie.

Nakapanglingo-lingo si Ronnie nga nagtan-aw nila ni Merson ug Beth. Migakos si Beth kang Merson samtang angayan kaayo ang dalaga nga ang iyang buhok nagpalid-palid sa hangin. (Sumpayan)