Bungsod sa mamala

Nahibulong si Fe sa iyang lolo ug lola (ginikanan sa iyang Mama Sonia). Puro sila retirado nga mga magtutudlo sa saring publiko. Pensiyonado na sila. Apan duna sila’y bungsod. Kada duha ka bulan mag-harvest sila sa ilang bungsod. Makakuwarta sila’g kuwatro mil ngadto sa singko mil pesos sa kuha sa ilang bungsod.

Nisamot ang kahibulong ni Fe kay sa iyang linghod nga pangisip, nakasabot siya nga ang bungsod naa sa dagat. Unya, wa gyud siya kamatikod nga ang iyang lolo ug lola niadto og dagat. Nia ra man sila sa dakbayan nagpuyo.

Gikan sa gamay pa si Fe, diha na siya puyo sa balay sa iyang lolo ug lola. Iyang Papa Jessie ug Mama Sonia, magtutudlo sab sa saring publiko. Magtutudlo sila sa  Carmen National High School. Tua sila didto gikan sa adlaw’ng Lunes hangtud sa Biyernes. Panahon sa tingtrabaho, tua sila puyo sa balay sa iyang Lolo ug Lola Emma (ginikanan sa iyang papa Jessie). Sabado’g Domingo ra sila magkita sa balay sa iyang Lolo Carlo ug Lola Ana, sa Guadalupe.

Otso anyos na si Fe. Naa na sa grade two. Ug si Lolo Carlo niya iyang drayber, hatud kuha niya sa eskuylahan. Si Lola Ana niya iyang yaya. Pinangga kaayo siya’s iyang mga apohan. Kada harvest nila’s ilang bungsod, hatagan si Fe og kuwarta para sa iyang alkansiya.

“La, sunod ninyong adto sa  inyong bungsod,  kuyog unya ko ha?” ni Fe ngadto’s iyang lola, usa ka hapon nga gikan  sila’s eskuylahan.

“Sige” ni Lola Ana niya. Nagpahiyom.

Biyernes sa hapon, pagpamuhi sa klase ni Fe, nangadto sila’s iyang lola sa opisina sa Banat News. Iyang lolo ang nagdrayeb sa gisakyan nilang Toyota Corolla nga abuhon. Pag-uli nila, gihatagan si Fe og dos siyentos pesos sa iyang lola, para sa iyang alkansiya.

“Ingon ka la, adto ta’s inyong bungsod?” ni Fe, nga nagpilo sa duha ka papel, aron masulod sa baba sa alkansiyang gama sa bulos sa gamay’ng kawayan. “Didto na bitaw ta” ni Lola Ana niya nga nagpahiyom.

“Di ba ang bungsod, naa mas dagat?”ni Fe. Naisang kilay.

“Ang among bungsod ni lolo nimo, bungsod sa mamala. Tigtampo mi’g sugilanon sa Banat News. Kada duha ka bulan mokobra mi’g writer’s honorarium. Mora mi’g nag-harvest og bungsod ini’g kobra” sa iyang lola.

“Unsa god diay?” ni Fe. Nakasabot na siya. Nisamot iyang pagmahal sa iyang mga apohan. (Kataposan)