Beauty Queen

Gula 2

Nakita nila ni Emerson ug Ronnie nga mihunong ang habal-habal nga gisakyan sa barangay kapitan atubangan sa dakong hawan nga adunay nagsugod na pagpundok nga mga tawo, kadaghanan mga bata nga nagdagan-dagan. Nakita nila ang upat ka dagko nga sound boxes nga maoy nadunggan nila nga nagtukar diha nga didto pa sila sa layo.

Giparada ni Ronnie ang motor sa daplin. "Diri na iparking ang inyong motor kilid sa akong balay dong," matud sa kapitan. Nasabtan ni Emerson nga balay diay sa kapitan kini'ng nahimutang sa dakong hawan nga may giandam na nga sayawan. Taud-taud, adunay tawo nga migunit sa microphone ug milanog ang pahibalo nga nahiabot na ang kapitan gikan sa dakbayan sa Sugbo.

Gidala sa kapitan sila si Emerson ug Ronnie sa iyang balay. Human sa ilang panihapon, nangandam sila kay ilang nakita nga nagsugod na pagpangabot ang mga tawo. Gidala sila si Emerson ug Ronnie sa kapitan didto sa hawan nga basketball court.

May indigay diay sa beauty queen kay nakita nila ni Emerson nga may giandam man didto sa gamay'ng stage nga lingkoranan. "Ang giadto nako sa siyudad kini ra g'yud nga mga pabuto nga gipalit nako sa Babag II sa Lapu-Lapu aron paalegre sa koronasyon karon," giingnan sa kapitan sila si Ronnie ug Emerson.

Gikuha sa kapitan ang microphone ug giawhag niya ang mga tawo nga mohugop na sa kalingawan aron makasugod na sila. Apan gisaysay sa kapitan ang aksidente nga nahitabo nga nadam-ag ang iyang gisakyan gikan siya sa siyudad. Gipasalamatan sa kapitan ang duha niya ka bisita nga maoy mitabang kanila nga makatawag dayon og ambulansya.

Mora'g midako ang atay sa duha ka maghigala nga gipaila-ila sila sa kapitan ngadto sa katawhan. "Problema Kap kay dili pa kita makasugod," matud sa usa ka tanod. "Ha? Ngano man? Daghan na ra ba'ng mga tawo nga nagpaabot sa koronasyon," pangutana sa kapitan.

Giingnan ang kapitan sa tanod nga tua pa sa Bogo ang tawo nga gitahasan nila sa pagbalak pahinungod sa makoronahan nga rayna. Nakapanglingo-lingo ang kapitan. Nasabot ni Emerson nga naproblema gayud ang kapitan kay wala’y makahulip sa modalit og balak. "Kun walay lain Kap, maantigo ko nga mobalak," giingnan ni Emerson ang kapitan. (Sumpayan)