Isla Paraiso

“Sir...” ang nalitok lamang ni Corporal Benturada dayon niining duol kang Rey.

Mahingawaon si Corporal Benturada nga mitutok sa panagway ni Rey. Nangluspad ang panagway niini. Hapit malukop sa bendahe ang nawong ug lawas niini. Maila kaayo nga maluyahon pa kini kaayo.

“Nganong miikyas ka man sa hospital, Sir?” Nangutana si Benturada. “Pastilan, nabalaka na kaayo kami nimo. Kaganina ra kaming adlawan nga nagsige’g pangita nimo.”

“A-ayaw sultihi si bisan kinsa, Benturada,” mipahimangno si Rey, “nga ania ako modangop sa imong pinuy-anan.”

“Nga-ngano man, Sir?”

“Basta lang. Tumana lang ang gihangyo ko kanimo.”

“Aw, kun maoy imong gusto, Sir, way problema.”

Ug giagak ni Benturada si Rey paingon sa usa ka lawak. Iya kining gipahigda. Giabagan niya si Rey sa pagpahimutang sa lawas niini sa mahunolhunol nga kama.  “Nabalaka ra ba pag-ayo si sister Veronica, Sir,” ni Corporal Benturada pa, “sa kalit mong pagkahanaw didto sa tambalanan. Wala siya mahimutang.”

“Lakip siya, Benturada,” ni Rey pa, “dili ko buot nga imong tug-anan mahitungod kanako.”

“Unya, Sir,” ni Benturada pa, “nabalaka ra ba kadto siya pag-ayo sa imong paglayas.” -- Sumpayan pa

Beauty Queen

Ni Cindy Jones

Hapon na nga nakagikan si Emerson dinhi sa dakbayan sa Sugbo aron mopauli og kadiyot sa ilang dapit didto sa Daanbantayan. Gihuwat man gud ni Merson ang higala niya nga si Ronnie aron iuban niya pagbisita sa ilang dapit sa probinsya.

Ang motorsiklo ni Ronnie mao ray gisakyan sa magbarkada. Nagsabot sila nga magbanus-banos lang sa pag-drive sa motorsiklo sanglit moabot g’yud og mga kapin sa duha ka oras ang ilang biyaheon.

Apan pag-abot sa magbarkada sa Barangay Lugo, sakop sa Borbon nasundan nila ang sakyanan nga nadam-ag sa balay daplin sa karsada. Wala hinuo’y namatay apan adunay samaron ug gitabangan sa magbarkada.

Sila pa gani ang nanawag og ambulansya kay si Merson aduna may kontak sa mga police station sa kalungsoran. “Nalangan g’yud hinuon ta bai Merson,” matud ni Ronnie dihang nahuman na nila’g tabang ang mga pasahero ug napasakay na sa ambulansya.

Usa sa mga pasahero nga natabangan nila ni Merson ug Ronnie nagpasalamat gayud kanila. “Salamat kaayo ninyo’ng duha dong. Kun wala pa kamo’ng duha madugay unta nga makatawag og ambulansya ,” matud sa tawo nga may edad na.

Nagpaila ang tawo nga kapitan sa barangay. “Nagdali unta ko kay bisperas ron sa among pista, nalangan na hinuon. Asa ba kamo paingon dong? Pwede imbitahon nako kamo nga mohapit usa sa among kalingawan?” matud sa nagpaila nga kapitan. Nagkatinutokay ang magbarkada. “Unsay imong plano bai Ron?” gisukna ni Emerson ang iyang higala. “Agad-agad ra g’yud ko nimo bai. Wala’y problema kay duna man ta’y sakyanan  ug makabiya man dayon ta kun gusto na molakaw,” matud ni Ronnie.

Miyango-yango si Emerson nga nagpasabot nga gidawat niya ang pagdapit sa kapitan. Nagpaila ang kapitan kanila. Sudlonon og gamay gikan sa karsada ang ilang barangay nga sakop na sa Bogo.

Mipara ang kapitan sa nagsingabot nga Ceres Bus ug misakay. “Sunda lang ko ninyo’ng duha,” matud sa kapitan. Mihunong ang bus sa usa ka eskena. Nakita nila ang karatola nga “Welcome to Barangay Binabag.” Misakay ang kapitan og habal-habal og gisunod nila ni Ronnie nga maoy nag-drive sa motor. Gisubay nila ang gamay’ng karsada nga sa matag kilid nahimutang ang daghang mga tanom nga tubo. Hapit na alas siete sa gabii ug may nadungog sila nga lanog nga tukar sa unahan. (Sumpayan)