Kuwarta sa karsada

Tinuod  gyud diay nga ang kuwarta puwede ra mapamunit sa karsada” matud sa pasahero nga diha sa luyo ni Andro nga maoy nagmaneho sa dyip depasaheroan  nga ilang gisakyan. Kalima na nagtunol ang pasahero nga hamtong lalaki sa mga plete sa ubang pasahero. Kay siya ang pinakaduol sa drayber, siya ang nadali og pamalihug sa pagtunol sa mga plete ngadto sa drayber.

Nakapahiyom si Andro karong buntaga. Naikog siya sa pasahero nga nagbarong og asul. Tagsa ra ni mosakay og dyip depasaheroan kay karon pa niya makita. Usa ka tuig na siyang nagdrayeb ini’g dyip nga iyang gimaneho karon “13C” ang rota. Biyahe’g Talamban-Colon.

“Pasensiya ka na Sir. Nga ikaw hinooy konduktor” ni Andro. Nikawat og hangad sa rear view mirror samtang nagmaneho.

Nagsubay na sila sa Gorordo gikan sa Tintay, Talamban. Padulong na sa Echavez. Puno sa pasahero ang dyip. 12 ka pasahero makalingkod matag kilid.

“Hain man diay imong konduktor?” sa pasahero.

“Nipalta. Kay nanganak ang asawa” ni Andro.

“Dako hinoon ka’g kita ron. Kay way bahinan”.

“Di sab gyud. Igo-igo lang. Mahal ang krudo. Mahal sab ang abangan.”

“Pero gipamunit gyud nimo’s karsada ang kuwarta”.

“Medyo. Pero daghan sang maru nga pasahero.” “Nganong maru man?” “Kun makamatikod nga way konduktor  di mamlete.

“Siyaro sab, mga tawhana,” “Lagi. Duna pa gyu’y mas maru”. “Unsay diskarte sa mga maru?”. “Di pa moplete, mangayo pa’g sukli.” Kabaga’g nawong!” Pero dihay natiman-an gyud nako. Wa gyud nako paminawa ang nagsige’g paningil og sukli.”

“Yati ra. Unsa may gibuhat niya?” Katulo naningil og sukli. Wa gyud nako tagda. Nanaug na lang.”

Nilili ang pasahero sa gawas. “Para Dong! San Miguel na man diay” sa pasahero. Gipahunong ni Andro ang dyip sa toong daplin sa karsada. Nitunol ang tawo og diyes pesos nga coin. Gidawat ni Andro. Suklian unta niya og peso. “Diha na lang na” sa pasahero dayong tindog.

“Salamat, Sir. Asa man diay ka?” ni Andro. “Sa NLRC. Naa koy hearing” sa pasahero.

Abogado diay ang pasahero. Seguradong may problema iyang serbis. Kay nag-commute man lang.

“Kun pul-an ko’s akong trabaho, moaplay unya ko pagka konduktor nimo” sa pasahero dihang nihana na’g labang sa karsada.

“Ha ha ha ha ha!” puwerteng katawa ni Andro, dayong paarangkada sa dyip.

“Maayo hinoon. Aron seguradong way makabukong. Ha ha ha ha ha!” dugang ni Andro. Nagpahiyom ang abogado dayong lahos og labang sa karsada. (Katapusan)