Isla Paraiso
Gula 224
“Asa ka man karon paingon gikan dinhi, sister Veronica?” Nangutana ang kapitan sa wala pa kini molakaw.
“Mopauli una ko sa kombento,” laktod nga tubag sa madre.
“Sakay na lang hinuon sa akong service jeep,” mitanyag ang kapitan.
“Daghang salamat na lang, Sir,” ni sister Veronica pa. “Mag-taxi na lang ko. Manawag lang unya ko nimo sa inyong buhatan aron magpakisayod kun unsay nahitabo sa lakaw sa mga polis nga imong gisugo sa pagpangita kang Rey.”
“Ikaw ang mag-igo, sister,” sa kapitan pa.
Pagkilab sa pipila ka daklit, ang kapitan misakay na sa service jeep. Gikawayan niya ang madre sa dihang gipadagan na niya ang sakyanan. Mibawos pagkaway si sister Veronica sa labaw nga opisyal ni Rey.
Sa dihang nakabiya na ang kapitan, mipara og taxi si sister Veronica. Gisultihan niya ang drayber nga magpahatod siya sa Orchids Sister’s Convent. Mitando ang drayber ug gipadagan gilayon niini ang sakyanan.
Samtang nagdagan ang taksi nga gisakyan ni sister Veronica, naglatagaw ang iyang hunahuna. Bisan unsa lay nasulod sa iyang kaisipan nga nakahatag kaniya’g kahasol. Nagbasol na hinuon siya karon kun nganong migawas pa siya sa tambalanan. Dili unta mawala si Rey kun gibantayan pa niya kini kanunay. -- Sumpayan pa
- Latest
