Kinutuban sa lawas

Alas sayis sa buntag. Nag-jogging si Kenneth, 57, gikan sa eskina Banawa ngadto sa Guadalupe Elementary School. Pero gikan na siyang nag-hike sa Ayala Business Park. Mopauli siya sa Gabutan Compound sa Guadalajara diin nag-abang siya’g balay. Disyembre 21, alas kuwatro imedya sa kaadlawon, nibiya siya sa ilang balay. Iya rang kapikas ang nisimba og Misa de Gallo kauban sa ilang katabang.

Ganiha, sa pagliko niya sa Gorordo Avenue gikan sa dalan Escario, unya padulong na sa Ayala, ni-jogging sab siya. Balig 650 ka tunob iyang nadagan. (Iyang iphon kay gitambagan siya’s doctor, nga dili na padaganon. Mag-hike na lang. Bisag unsa kalayo. Apan ganahan gyud siyang mo-jogging). Layolayo iyang nadagan. Kay lugsongon og gamay ang dalan. Pero sa dalan V. Rama padulong sa simbahan sa Guadalupe, tungason og gamay. Sa niaging tuig, (kay duha ka tuig na siyang nag-hike) naglisod gani siyag 400 ka tunob. Karon, pag-abot sa 460 ka tunob, kutas na kaayo. Niurong siya’g dagan. Naglakaw na lang siya. Unya may nakatupad niya’g lakaw nga lalaki nga nag-hike.

“Kutas na gyud, sir? Dinhi ra gyud ka kutob. Maayo gani kay maka-jogging ka pa. Ako, lakaw nalang gyud. Mahadlok ko’g atakehon sa kasingkasing kun modagan” sa lalaki nga kuwarentahon ang pangidaron.

“Kining bisyo, makadani gyud og daut sa lawas. Pito ka tuig na kong nibiya og inom” ni Kenneth nga nipugos og sulti bisa’g gikutasan pa.

“Mao lagi. Ako gipahunong na ko’g inom ug sigarilyo” sa lalaki.

“Wa pa man kaha kay kuwarenta?” ni Kenneth. “Hapit na. Pero, magkawatkawat gihapon ko’g inom ug panigarilyo. Basta malipat ang asawa” sa lalaki. “Pero, kun madaut na gani ka’s bisyo, kinahanglan biya na lang gyud. Mangita na lang og laing kalingawan” ni Kenneth.

“Chicks na lang, sir” sa lalaki. Nagpahiyom.

“Kana kun madala pa’s lawas. Kay kun mogamit sab naa kay ayuda nga tambal, sa lawas gihapon pauli. Daghan nang namatay ibabaw sa kamay” ni Kenneth. “Sige, sir Merry Christmas” sa lalaki. Niliko sa eskina Kabajar. “Same to you. Dinhi ra diay ka? Ako sa Guadalajara pa” ni Kenneth. “O. Kita ta ugma. Kun magkadungan gihapon ta’g pasingot” sa lalaki.

“Sige” ni Kenneth. Nipadayon og lakaw.

Gisundan ni Kenneth og tan-aw ang lalaki. Ug nahunahuna niya sa kaugalingon nga lainlain gyud og kapasidad ang lawas sa tawo. Dunay batan-on pa nga madaut na’s bisyo. Duna say matiguwang na lang, wa pa gyud nadaut. Apan siya, pagka-singkwenta, nadaut na. Busa, nibiya gyud sa bisyo sa hingpit. Kay daghan siyang higala nga nibiya og kadiyot sa bisyo unya nibalik, nagrabihan gyud. Kun mobiya na gani, biya na lang gyud. Ang pagbalikbalik sa bisyo, maoy makapasamot sa kadaut sa lawas. May kinutuban ang lahutay sa lawas. Kun dili kasabot ang tag-iya sa lawas, kuyaw mohunong ang edad. (Kataposan)