Ang dila ni Samuel mangtas

Uy, Pilong, Pilong, dali ra gud, tan-awa ra gud ning dila sa bata! ni Osang ngadto sa iyang bana. Midali pagduol si Pilong pagkabati sa kusog nga sangpit ni Osang nga iyang asawa.

“Ngano! Ngano, uy?” ni Pilong pa usab. Unya maoy misugat sa iyang panan-aw ang labihang taasa nga dila sa ilang puya nga anak nga ginganlan nila’g si Samuel. “Uy, hala, naunsa man na, Osang, ka taas gud anang dila sa bata, ngano man na? Sus, taasa , uyyy!”

“Mao bitaw nga gitawag tika. Pero, okey ra man siya. Pilong kay nagduwaduwa man,” ni Osang pa.

“Pero makapahibulong Osang, nga taas man diay kaayo’g dila kining atong anak,” ni Pilong pa nga ingon sa dunay gihanduraw.

“Pilong, dili kaha mao na ni ang giingon sa imong inahan,” ni Osang pa.

“Ang hain adto, ha, Osang?”

“Kadto bang gisulti ni nanay Luncia, nga ang iyang apo maoy maliwat sa imong amahan nga si tatay Okor nga kaliwat og ungo,” ni Osang pa ngadto sa iyang bana. Duna man guy tabitabi nga sila si Pilong kaliwat og ungo, nga kadtong iyang amahan nga si Okor mao ang pinakamangtas nga ungo sa sityo Buwan-Dugo, pero, mura ma’g nahilom ang maong tabitabi. Ug karon nahinumdom si Pilong sa gisulti sa  iyang nanay Luncia.

Miyango-yango na lang si Pilong. Tuod, dihang midako na si Samuel dunay higayon nga gabii na kining mopauli. Sagad halawom nang gabii. Ug dihay kausa nga dunay naninggit kay duna kunoy usa ka itom nga iring nga mitangag sa hiniktang sunoy sa ilang silingan nga si Kadyo ug wala na kini igkita. Hangtod nga usa ka gabii, miduol si Samuel kanila ni Osang ug Pilong.

“Nay, Tay, wala na ko kasabot sa akong kaugalingon kay matag takdol sa buwan, mahimo man kong iring itom,” niini pa.

“Ha, kun mao na, ikaw diay ang iring itom nga nadungog dinhi sa ato, Dong Samuel, nga daghan nang gipangkaon nga mga sunoy?” ni Pilong pa.

“Oo,” mubong tubag ni Samuel.

“Anak, okey lang ni, kay kaliwat man ka’g ungo, pero, hangyo lang, ayaw gyud pagsuway og pamiktima’g tawo, ayaw pangunay og silingan,” hinay ang tingog ni Pilong.

Miyango si Samuel. Pagka-gabii, dihay ngiyaw sa iring nga dugay kaayong miundang. (Kataposan)