Bilanggo sa kaminyoon

Katamtaman lang ang gikusgon sa dagan sa kotse nga gisakyan ni Gina subay sa highway gikan sa Carmen ngadto sa tugpahanan sa Mactan. Dili man haras mopadagan si Frank bana ni Gina, nga usa ka Aleman. Disiyete anyos na silang minyo. Apan way anak kay gi-vasectomy na man ang Aleman.

Molarga sa Amerika si Gina. Mobisita siya ni Lina iyang maguwang nga naminyo ni David, Amerikanong negosyante. Si Lina receptionist sa usa ka five star hotel. Maayo gani kay gitugutan siyang Frank nga mobiyahe. Pero nasayod siya nga gusto sab si Frank nga mobiyahe si Gina, aron makalugar siya’g pamabaye.

Kulba hinam ang gibati ni Gina. Nia pa sila sa highway sa lungsod sa Compostela ning sayong kahaponon. Alas siyete pa sa gabii iyang flight. Nisayo sila’g gikan kay nanagana sa trapik. Naa ra sa hunahuna ni Gina ang iyang tinood nga tumong ug tuyo sa Amerika. Way kalibutan iyang kapikas, nga puwerteng but-ana sa uyab pa sila.

“Why are you silent?” ni Frank nga nidalikyat og lingi sa kapikas sa iyang too sa front seat sa kotse, samtang nagmaneho.

“I felt sad to leave you. I will miss you when I’m away” ni Gina. Nanghupaw. Subo ang hitsura.

“I think we need to be away from each other for a while. We often quarrel on trivial matter” ni Frank.

“Ya, may be!” ni Gina. Wa na nisumpay.

Dili “trivial matters” ang ilang kasagarang awayan. Kanang tratahon siyang mora’g maid atubangan sa mga bisita niyang mga Aleman. Kanang pukawon siya’g patid kun dugay kamata. Kanang dagmalan siya ni Frank kun mahubog ang naulahi. Kanang mangabang siya’g burikat.

Sa napulo ka tuig nilang puyo sa Germany, nakatabang si Gina sa iyang mga ginikanan ug mga igsoon. Kay dako man siya’g suweldo sa iyang natrabahoang banko didto. Unya gusto man gyud ni Frank nga mopuyo og Pilipinas. Nagpalit siya’g house and lot sa baryo Bantique daplin sa baybayon. Diha na sila namuyo sulod sa pito ka tuig. Ulipon ang trato ni Frank ngadtong Gina. Sa sayisinta mil pesos tugbang sa pension ni Frank nga Euro, diyes mil ra gyuy ihatag matag bulan nga allowance ni Gina. Kulang ra sa panghindik ni Gina. Grabe iyang pag-antos ining iyang bana nga palahubog, himabaye, dagmalan ug tihik nga way sama.

Inig abut niyas Amerika, patabang siya’s iyang igsoon nga makatrabaho. Unya, dangta’g unom ka bulan, mangita siya’g abogado. Ipahikay niya ang papeles para makadiborsiyo ni Frank. Lakawon niya iyang kagawasan isip asawa ining kaminyoon nga mora’g bilanggoan. (Katapusan)