Isla Paraiso

Gula 221

Diha ra mopalit og pagkaon si sister Veronica sa usa ka restawran sa atbang sa hospital. Nagdali siya pagbalik ngadto sa ward ni Rey. Nahingawa siya nga wala’y nagbantay sa pasyente.

Midiretso si sister Veronica pagsulod sa lawak nga nahimutangan ni Rey nga nagdala nag mga pagkaon. Apan misiga ang iyang mga mata sa dihang napaud ang iyang panan-aw sa kama. Wala na didto si Rey. Gisusi niya ang CR sulod sa maong lawak apan wala niya makita si Rey. Dihadiha milakdop kang sister Veronica ang kakulba. Misantop sa iyang hunahuna nga milayas si Rey sa hospital. Wala tuyoa, may mga luha nga namidpid sa mga aping sa madre.

Ang mga tawo sa sulod sa tambalanan natugaw sa singgit ni sister Veronica nga nagpanawag sa ngalan ni Rey. Migawas siya sa lawak nga nahimutangan ni Rey nga nagpunay’g panawag sa lalaki. Iyang gitaho ngadto sa mga empleyado sa hospital ang kalit nga pagkahanaw ni Rey. Dihadiha naukay ang tibuok hospital. Gisuhid gilayon sa taga hospital ang tibuok palibot sa tambalanan aron pagpangita kang Rey.

Si sister Veronica midali pag-adto sa usa ka tindahan sa atbang sa tambalanan. Mihangyo siya sa tag-iya niini nga mogamit siya sa telepono. Misanong ang babayeng hamtong nga maoy nagbantay sa tindahan. Gidayal gilayon ni sister Veronica ang numero sa kuwerpo sa kapolisan. Maoy iyang gipangita si Capt. Sancho Benale.  -- Sumpayan pa