Pitaka nga kinit-an
Gula 5
Tukma kaayo ang pagpangimbitar ni Katryn nga pasuroyon si Andro sa iyang balay sa Labangon. Gilaay si Andro nga mosuroy sa mga department store nga maoy sagad niyang himuon gikan siya sa opisina.
Duha ka buwan na nga migikan paingon sa abroad ang girlfriend ni Andro kay adto manarbaho mao nga ang pagsuroy lang sa mga department store ug mall maoy iya’ng gikalingawan unta.
Gitawag ni Andro si Katryn. Iyang gitug-anan nga moadto siya sa iyang panimalay. Dali ra nga tultolon ang balay ni Katryn kay anaa ra kini mahimutang duol sa skywalk atubangan sa Labangon Elementary School.
Misakay si Andro og PUJ nga rota 12F ug diha gayud siya mohunong duol sa skywalk. Hapit na mokilum-kilom kay misiga na gani ang mga suga sa poste. Gipaliraw ni Andro ang iyang mga mata.
Gipangita niya ang balay nga gihulagway kaniya ni Katryn. Taud-taud, mi-ring ang iyang selpon. Si Katryn ang nanawag. “Dali na, tabok sa karsada,†matud ni Katryn.
Tuod, nalantawan ni Andro si Katryn nga nagbarog sa binuksan nga pultahan. Nasalipdan diay kini og gamay sa skywalk mao nga wala dayon makit-i ni Andro.
“Pinobre lang tawon ni’ng akong balay Andro.. dali sulod,†agda ni Katryn. Nagpangliraw ang mga mata ni Andro pagsulod niya sa balay. May nakita siya nga duha ka babaye didto sa kusina. “Kinsa’y kauban nimo dinhi sa balay Kat?†gisukna ni Andro ang amiga. “Ako ra ug ang akong anak. Aw duna ko’y katabang ug kusinera,†ni Katryn.
Mitindog si Katryn ug mipaingon sa kusina. Mibalik kini sa nahimutangan ni Andro. “Dali na, mangaon na ta kay andam na man ang pagkaon sa lamesa,†agda ni Katryn.
Una pa kini nga higayon nga nagkadungan sila pagpangaon si Katryn ug Andro. “Asa man ang imong tindahan?†gipangutana ni Andro samtang nag-usap sa iyang pagkaon.
Gitug-anan siya ni Katryn nga sa unahan nahimutang ang gamay’ng merkado sa Labangon ug tua mahimutang ang iyang tindahan. “Ang akong manghod ang nagdumala didto, may kauban lang siya,†ni Katryn.
“Nakasal ka ba g’yud sa amahan anang imong anak Kat?†ni Andro nga nagsugod na og pangusisa. "Wala, wala kami makasal," pintok nga tubag ni Katryn. (Sumpayan)
- Latest
