Nagduda

Dear Tita Salie,

Have a wonderful day. Just call me Concisa, single pa. Nag-problema ko sa akong lovelife karon. Manghinaot unta ko nga imo kong malamdagan.

Aduna ko’y boyfriend apan tua siya karon sa gawas, sa laing nasud sa USA. Mingaw gyod kaayo, Tita, apan ako na lang giagwanta kay unsaon nga nagtigom man siya’g kuwarta alang sa iyang pamilya ug sa among umaabot nga pamilya.

Ang nakahasol kanako mao nga dili man siya mo-text nako. Maghulat lang siya ako’y mouna pag-text kaniya. Kun dili ko mo-text wala ra pud mi communication. Nagduda na hinuon ko niya, Tita. Love kaha ko niining tawhana? Palihog pasabta ko. Thank you very much and more power.

* * *

Dearest Concisa,

Ayaw una pagdalidali sa imong hukom kay wala pa man nimo masuta ang tinuod niyang sitwasyon. Tingali kun lisod kaniya ang pagteks kanimo. Kay abi god nimo mahal kaayo kun sila mokontak o moteks kanato dinhi. Unya kun ang imong uyab perti gyod niyang tigom didto kay dili baya lalim ang trabaho busa maghulat na lang siya kun duna kay message aron siya makatipid.

Mas maayo seguro kun mogamit ka og internet aron puyde mo nga mag- facebook o kaha mag-estorya sa Skype. Kay niining paagiha dugay ug taas ang oras nga mag-estorya mo ug dili ka dako og gasto.

Ayaw pag-undang sa pagpangita og paagi aron imong mabuhat ang gusto nimong buhaton.

-- Tita Salie