Maayo lang sa bukid

Alas singko sa hapon. Maglung-ag na unta si Virgie alang  sa panihapon. Nanoktok siya sa lawak sa nag-abang sa balay sa iyang amo.

“Ayo!” ni Virgie dalang panoktok sa pultahan.

Kining lawak naa sa ground floor sa dos andana nga balay ni Albert amo ni Virgie. Niabli ang pultahan. Hamtong nga babaye ang nagbarog sa abli na nga pultahan.

“Ma’am, puwede ko mohulam og posporo? Wa man ko kakita’g posporo sa among kusina” ni Virgie.

Dugay nakatingog ang babaye. Nagtutok ni Virgie. Daw nabag-ohan siya. Na-istrikta ang tinan-awan.

Wa pay semana nga maid si Virgie ni Albert, biyudo, magtutudlo sa saring publiko. Gikan pa sa probinsiya si Virgie. Karon pa nakataak og siyudad.

“Wa sab ko kahibawo hain among posporo, Day. Nipauli man sa ila among maid. Siya ra may nasayod kun hain tagoi niya ang posporo” sa hamtong babaye. Nanira og balik sa pultahan.

“Virgie! Unsay imong gianha sa lawak ni Mrs. Sanika?” ni Albert. Maoy pag-abot gikan sa eskuylahan nga malakaw lang ang gilay-on gikan sa iyang balay.

“Manghuwam unta ko’g posporo!” ni Virgie. Inosente kaayo.

“Kanang huwamhuwam og posporo o bisan unsa sa silingan, di na kana puwede dinhi sa siyudad. Maayo lang na sa bukid nga kun mahutdan og posporo, unya wa pa kalugsong, puwede manghuwam sa silingan. Dinhi, maka-uuwaw kaayo nang huwamhuwam og posporo. Diay kuwarta o. Pagpalit sa tindahan” ni Albert. Nikuot sa pitaka. Nipagawas og P20 nga papel de banko.

Nakapanap-ong sa iyang baba si Virgie. Nanglipaghong. Ug gidawat ang kuwarta aron ipalit og posporo. Nagdali siyang nibiya sa iyang amo aron di madugangan ang  iyang kaulaw. (Katapusan)