Pitaka nga kinit-an

Gula 3

"Hello? Si Katryn ni Sir… napunitan tuod nimo ang akong pitaka Sir?" matud sa tingog sa babaye nga didto sa pikas linya. Daw may pagka paraygon ang tingog sa babaye nga nadungog ni Andro.

Gitangdo ni Andro nga anaa kaniya ang pitaka. Samtang nakigsultihanay kang Katryn, gisud-ong ni Andro ang hulagway sa babaye nga diha sa pitaka. "Asa ka dapit Sir? Anhaon tika ha?" ni Katryn pa.

Nagkasabot gayud sila si Andro ug Katryn nga magkita. Gi-save dayon ni Andro ang numero sa selpon nga gigamit ni Katryn sa pagkontak kaniya. Mahinamon siya nga nagpaabot ni Katryn didto sa lamesa nga nahimutang daplin sa food court.

Gikan sa nahimutangan ni Andro, makita niya ang mga tawo nga moabot sa ika-upat nga andana sakay sa escalator. Gitutokan niya pag-ayo ang hulagway ni Katryn aron nga makaila dayon siya niini kun moabot na.

Bisan og giunsa niya’g tan-aw, sigurado gayud si Andro nga guwapa nga pagka-babaye si Katryn. Human matagbaw ang mga mata ni Andro sa pagsud-ong sa maanyag nga hulagway ni Katryn, gibalikan niya'g lantaw ang escalator.

Wala siya mosipyat kay mao gyu’y pagtangka sa usa ka babaye nga nagsige'g lingi-lingi sa pag-abot niini sa ika-upat nga andana. Nailhan dayon siya ni Andro nga mao si Katryn kay walay kalainan ang iyang panagway sa personal kun itandi sa hulagway.

Giwara-warahan ni Andro si Katryn. Nakit-an dayon si Andro ni Katryn nga mipahiyom dayon nga mipaingon sa iyang nahimutangan. "Ikaw ba ang nakapunit sa akong pitaka?" matud ni Katryn.

Wala dayon motubag si Andro. Mitindog siya agi og pagrespetar sa babaye ug miagda sa pagpalingkod. "Unsay imong order kay magkuha ko," matud ni Andro ngadto kang Katryn.

“No thank you, busog pa ko,” matud ni Katryn. Milingkod si Katryn atbang sa gilingkoran ni Andro. “Wala g'yud tinuo'y kalainan ang imong panagway sa personal kun itandi sa hulagway nga dia sa imong pitaka," matud ni Andro dungan sa pagtunol niini kang Katryn.

Mipahiyom si Katryn. "Salamat g'yud kaayo nga ikaw ang nakapunit sa akong pitaka." (Sumpayan)