Unos sa kapalaran - Gula 7

Wala magtuo si Maribel nga managkaila diay si mama niya Maria ug si Cleofe nga inahan ni Ernest. Apan misamot ang kahingangha sa dalaga diha nga mihilak si mama niya Maria ug migakos kang Cleofe. Naghinilakay ang duha ka babaye. Pareho nga wala makatingog sila si Ernest ug Maribel diha nga misaysay si Maria sa iyang kaagi ug nasayran nga managsuon sila si Cleofe.

Wala magustohi sa ginikanan ni Maria ang amahan ni Maribel mao nga nagtaban sila ug didto manimuyo sa Davao. Wala na gayud mokontak pa si Maria sa iyang mga ginikanan.

Nagtinutokay sila si Maribel ug Ernest. Takulahaw lang mga lusok sa luha nanaligdig sa kaapingan sa dalaga. Nahuna-huna ni Maribel ang sitwasyon nila ni Ernest nga may nahitabo na kanila apan dili sila mahimo nga       magminyo.

Naghilak si Maribel samtang gialam-alaman siya sa iyang inahan. Nahimo’ng daw kandela nga giugbok sa iyang gitindogan si Ernest nga wala masayod unsa’y iyang buhaton. Midanguyngoy pag-ayo si Maribel ug midagan gawas sa ilang balay. Wala na gani niya pamatia pa ang singgit ug pagtawag kaniya sa iyang  inahan.

Misakay si Maribel og “habal-habal” ug nagpahatod sa agianan sa mga sakyanan. Wala gayud siya mahinultol og unsay iyang buhaton. Gibati niya ang grabe’ng kauwaw sa kaugalingon nga ang iyang ig-agaw maoy nakapusgay sa iyang pangandoy.

Mibalhin si Maribel og PUJ nga nagbiyahe paingon na sa Davao City. Pag-abot na sa kahaponon, giabot na siya’g kagutom. Nakahuna-huna siya pagduol sa usa ka karenderiya ug mihangyo nga mokaon ug bugtian lang niya og serbisyo pagpanghugas sa mga kinan-an.

Nasayran ni Maribel nga ang tag-iya sa karenderiya nga iya’ng nadangpan may igsuon nga mibisita lang sa Davao ug nanginahanglan og katabang sa panimalay sa Cebu. Gihangyo sa dalaga ang igsuon sa tag-iya sa karenderiya nga mouban siya pagpauli sa Cebu aron anhi manimpalad og trabaho. Luhaan ang mga mata ni Maribel nga mibiya sa Davao luwan sa barko.

Karon, supervisor na si Maribel sa kompaniya sa babaye nga iyang giubanan gikan sa Davao. Birthday ni Maribel ang Hunyo 22, ug takulahaw lang iyang nahandom ang adlaw nga natugyan niya kang Ernest ang iyang kaugmaon didto sa cottage sa beach resort. (Kataposan)