Isla Paraiso

Gula 213

“Sa kadaghan sa mga tawo nga mahimong imong hilabtan, SPO3 Rey Corpuz, nganong ang ako pa man gayud nga  pundok ang imong nakursonadahan. Karon...unsa man ang imong gidangatan?”

“Hayop ka, Col. Villadar,” ni Rey pa. “Dili ka angay magsul-ob sa uniporme sa usa ka tinugyanan sa balaud. Usa ikaw ka hoodlum.”

“Ikaw ang dili na magsul-ob og uniporme sa usa ka polis, Corpuz,” ni Col. Villadar pa, “tungod kay ugma sul-oban ka na sa sapot nga panghaya. Busa pangadye nang daan, Corpuz, kay patyon ko na ikaw!”

Ug gitumong ni Col. Villadar ang sumbohan sa iyang armas ngadto kang Rey. Kablit na lang ang kulang ug mobuto na kini.

Apan si Rey wala mobati bisan diyotay na lang nga kalisang. Maisogon siya nga mitan-aw kang Col. Villadar.

“Seguroa gayod nga mapatay ko nimo, koronel,” nagkanayon si Rey, “kay kun mabuhi pa gani ako, wala na akoy plano nga buhion ka pa.”

Milanog ang kusog kaayong bahakhak ni Col. Martin Villadar. Bahakhak nga gihidhiran og kantalita.

“Hinumdomi, Koronel,” ni Rey pa, “nga wala’y dautan nga motunhay.”

“Usa kana ka dakong bakak, Corpuz,” matud ni Col. Villadar. “Ingna hinuon nga ang daotang sagbot dili daling mamatay.” -- Sumpayan pa