Isla Paraiso - Gula 2112

“Dili mo ako mapatay,” nagkanayon si Col. Villadar, “gawas kun gusto mong maangin kining babaye nga imong gimahal.”

Wala makalihok si Rey sa iyang gibarogan. Midagko ang iyang pagginhawa. Hait kaayo ang iyang tinan-awan ngadto sa koronel.

“Buhii kanang gigunitan mong mga armas!” Maisogong mando sa koronel.

Dugay nga mikihol si Rey. Naghunahuna siya sa angay niyang buhaton. Apan nasuta niya nga wala siya’y laing mahimo gawas sa pagpahignunot sa mando ni Col. Villadar. Nakita niya nga natuok na si sister Veronica sa bukton niini nga gisipit sa liog sa madre. Ang tumoy sa armas sa koronel gidaitol pag-ayo niini sa liog ni sister Veronica. Ang maong talan-awon maoy nakapapugos kang Rey sa pagbuhi sa  .45 kalibre ug Uzi nga iyang gigunitan. Mihagsa ang duha ka armas sa salog nga semento.

Milanog ang katawa ni Col. Martin Villadar sulod sa underground. “Sa kataposan, mahulog ka na gayud sa akong mga kamot, SPO3 Corpuz!”

Mahimut-anon kaayo si Col. Martin Villadar. Si sister Veronica iya gihapon nga gisipitan sa iyang walang bukton. Ang mga mata ni SPO3 Rey Corpuz didto ra sa koronel. Iyang gipanid-an ang mga lihok niini. “Ugok kang dako, Corpuz!” Mapungtanong namulong si Col. Villadar. -- Sumpayan pa