Isla Paraiso

Gula 211

Gipusil ni Rey ang usa ka kaaway nga iyang nakit-an nga buot moluthang kaniya sa budhi nga paagi. Pagkakita niya nga nahagba kini sa salog nga naigo sa iyang pagpusil, diha-diha mikuripas ang iyang mga tiil nga nanaog sa sementong hagdanan.

Wala madugay nahitukmaan niya ang usa ka seradong pultahan sa underground. Kalit niyang gisikaran ang palid sa pultahan. Pagkaabli niini, dihadiha misulod siya nga ang mga kamot nga naggunit sa Uzi ug .45 kalibre maoy iyang gipauna.

Mingaw ang sulod sa underground. Apan wala siya mokompiyansa. Nag-amping siya sa iyang paglihoklihok.

Nakita niya nga may mga steel cabinet sulod sa maong underground. Haluag ang maong underground. Daghang mga butang nga kapasalipdan o katagoan. Posible nga may mga kaaway karon nga naniid kaniya nga nanaghupo sa kadaplinan. Mao nga gihait niya ang iyang panan-aw aron dili siya malipat ug maunhan sa mga kaaway.

Unya, kalit lang kaayong nahalingi si Rey sa iyang luyo. Mao dayo’y misugat sa iyang mga mata si Col. Villadar. Diha-diha gitumong niya ang sumbohan sa duha ka armas nga iyang gigunitan ngadto sa koronel. Apan dili niya mahimong pusilon si Col. Villadar. Gi-hostage niini si sister Veronica. Ang armas nga gigunitan ni Col. Villadar gition niini kang sister Veronica. -- Sumpayan pa