Bar girl - Gula 6

Nananghid si Leny kang Delfin nga moadto siya sa dressing room. Giingnan niya si Delfin nga dili na lang siya mo-duty kay mao ma’y gisulti sa anak sa tag-iya sa Wild Orchids Bar.

Nasagmuyo si Delfin tungod kay siya ang hinungdan nga gikasuk-an si Leny sa anak sa tag-iya sa bar. Nakahuna-huna siya nga mangayo siya’g pasaylo ni Wendel nga anak sa tag-iya sa Wild Orchids Bar.

Pagbalik ni Leny nga nakailis na sa ordinaryo nga sapot, iya kini’ng gitug-anan sa iyang plano nga mangayo’g pasaylo ni Wendel. “Ayaw uy… ayaw g’yud kay molapad ang kasing-kasing niana’ng tawhana,” matud ni Leny.

“Unya, unsa na man la’y buhaton nimo karon Len?” ligdong kaayo ang panagway ni Delfin nga diha pa sa galamhan ang kasagmuyo sa gidangatan sa iyang amiga. “Molakaw na lang ko uy kay basin maabtan pa ko dinhi sa amahan ni Wendel ug hangyuon na ‘sab ko nga mo-duty lang,” ni Leny pa.

Nanggawas sila si Leny ug Delfin gikan sa bar nga gitrabahoan sa dalaga. “Kun gusto ka, maglingaw-lingaw na lang ta Len, mag-disco ta. Dia man ko’y kuwarta,” giingnan ni Delfin ang bar girl. “Tana, mas maayo hinuon aron malingaw ko,” matud sa dalaga.

Misakay sila’g taksi ug mipaingon sa General Maxilom Avenue. Suheto si Delfin sa mao nga diskohan kay nakasulod na sila didto kauban sa iyang mga classmate. Tuod, abtik kaayo nga nakigsayaw si Leny kang Delfin.

Enjoy kaayo ang duha nga nagpares sa pagsayaw. Takulahaw lang nga nagkasuod sila pag-ayo. Gipaningot si Leny dihang milunga sila sa pagsayaw. “Maayo ka man diay mosayaw Delfin,” matud ni Leny nga nagpahiyom.

Miorder si Delfin og ilang mainom… upat ka botelya nga light beer. “Mas maayo ra ‘sab uy nga wala na lang ko motrabaho kay nakalingaw-lingaw ko. Kapoy na kaayo sa bar nga magsigi’g pamugos si Wendel nga makigdeyt nako, maayo unta kun nakagusto pa ko niya,” ni Leny pa.

Gihatud na ang ilang giorder nga mainom. Miinom sila sa wala pa mamalik sa pagsayaw. (Sumpayan)