Nakabawos si Sebyo sa agta!

Nabaniog na sa tibuok balangay nga giabat si Sebyo sa agta sa may mangga ni ‘Yo Victor. Bahag ang iyang ikog pagdinagan. Gikuyapan ug nahuwasan sa kahubog si Sebyo sa kahadlok ug sukad niadto, bag-o na ang iyang apelyido: Sebyo Talawan....!

Makalagot nga paminawon labi na nga ang tinan-awan sa iyang mga silingan medyo sabtonon kaayo. Ug human sa panihapon milighot paglakaw si Sebyo padulong sa mangga ni ‘Yo Victor nga wa sab mananghid sa iyang asawa nga si Talina.

Paspas ang iyang linaktan bitbit sa ulisi ilawom sa nagpirat nga kahayag sa kagabhion. Naagian ni Sebyo si Dencio ug Naldo nga nangharana sa dalagingding ni Nang Ason. Pagtangka sa mangga ni ‘Yo Victor, mihunong si Sebyo ug gianinaw pag-ayo ang mga sanga. Wa siya’y nakitang talagsaon mao nga mipasilong siya ug misandig sa punoan sa mangga nga naghangadhangad. Way timik ang mga dahon....! Taudtaod, kalit nga nauyog ang sanga sa mangga ug way kahadlok nga mihagit si Sebyo?

“Oy, agta, kanaug diri kay magtiwas ta...!” Hagit ni Sebyo nga naghangad sa sanga ug hugot nga gikuptan ang ulisi.

May mihagsa sa ubos ug giatubang si Sebyo sa tawong itum, naghubo, siga ang mata, ug kalkag ang buhok. Nangandam si Sebyo pag-amara sa iyang ulisi ug miasdang kaniya ang tawong itum. Misibog diyutay si Sebyo nga nag-amara sa ulisi paingon sa hayaghayag nga dapit sa mangga, ug PAKKK! Naigo sa ulisi ang ulo sa itum nga tawo nga gisundan sa bunal sa tuhod.

Nahayang ang tawong itum ug sa dihang usban na unta pagbunal ni Sebyo, misinggit ang tawong itum:

“Ayaw Noy Sebyo...., si Masyong ‘ni....!” Nagpakiluoy ang tawong itum nga nahayang.

“Masyong ‘ni...? Ikaw diay ang agta sa mangga...!” Napuypoy ang kapungot ni Sebyo.

Gigunitan ni Sebyo ang kamot ni Masyong ug gibunlot sa may poste duol sa mangga. Mibiya ug milakaw si Sebyo bitbit sa nagkadugong ulisi. Gihapit niya sila si Dencio ug Naldo nga nangharana sa ilang Nang Ason.

“Adtoa ninyo si Masyong sa may poste duol sa mangga ni ‘Yo Victor.” Matud pa ni Sebyo nga mipadayon paglakaw pauli sa iyang balay.

Giadto dayon ni Dencio ug Naldo ang giingon ni Sebyo ug ilang nakita si Masyong nga nagyaka sa poste duol sa mangga ug nag-aguroy sa kasakit.

“Masyong, naunsa ka...?” Nagkanayon si Dencio nga nahibulong.

“Nahinaykan sa garote ni Noy Sebyo. Ihatud ko ninyo sa ospital behhh...!” Hangyo ni Masyong.

“Hala, pangabat pa..., siyaro’g di motagam...!” Namulong si Naldo nga nagsalib-ay sa sista.

Giagak nila si Masyong nga nagtakihod kay dad-on sa tambalanan samtang si Sebyo nahimuot sa gidangatan ni Masyong. Nakabawos na si Sebyo sa agta sa may mangga ni ‘Yo Victor....! (Katapusan)