Ang tiguwang

Tulo na ka semana nga wa gyud nahatag ni Jimmy ang gipangayo ni Celso. Umagad ni Celso si Jimmy nga usa ka computer engineer ug eksperto mahitungod sa Internet. Puwede siya maka-download gikan sa Internet og bisan unsang kanta sa bisan unsang grupo sa mga banda o mag-aawit . Hapit na si Celso kahunahuna nga mamuyboy  sa umagad.

Di ba diay siya makahunahuna sa pagpamuyboy nga wa man gyud mag-ila og utang kabubut-on niya iyang umagad ug anak nga si Sonia. Semi-retire na si Celso sa iyang propesyon nga usa ka CPA. Wa na siya nanarbaho isip magtutudlo og mga subject sa Accountancy. Wa na sab siya nanarbaho isip Chief Accountant sa usa ka kompanya. Solo na lang siya sa iyang opisina isip Accounting Firm sa dakbayan sa Mandaue uban sa iyang kapikas nga si Nova, nga mao ra say iyang sekretarya.

Nagpuyo si Jimmy ug tibook niyang pamilya nga may duha ka anak, sa balay mismo ni Celso. Way abang. Libre sila sa kuryente, telepono ug tubig. Libre sila sa konsomo. Dagko sila’g suweldo. Si Sonia call center agent. Ila ra ilang sweldo. Sa tanang gastohan, nagsalig sila ni Celso. Unya si Celso pa ang drayber hatud kuha sa ilang apo nga si Fe, (anak ni Jimmy ug Sonia). Si Nova ang nahimong yaya. Way gipakita nga appreciation silas Jimmy ug Sonia sa gasto ug kahago sa mga apohan sa ilang anak.

Unya sa gamay’ng pamarayeg ni Celso, wa pa gyud kahatag si Jimmy. Si Celso kay mag-hike kada buntag, dunay gikalingawan nga bisyo. Magmemorya siya’g kanta samtang maglakaw. Nangayo siya’g wording sa tulo ka kanta nga nag-ulohan Quizas Quizas Quizas, Unforgettable ug Vicent.

Paglabay sa usa ka semana human nihangyo si Celso ni Jimmy, niingon si Jimmy nga na-download na niya. Ang pag-print na lang sa computer ang kuwang. Paglabay sa tulo ka semana wa nay hisgut si Jimmy. Abi kaha niya’g nakalimot na si Celso. Wa ra ba gyud.

“Unsa may problema nimo Pa? Nga magsigi ka man lang og panghupaw? Unya di ka man lang magtingog? Mora man ka’g may gipangluoran” sukot ni Jimmy usa ka Domingo sa buntag. Ikaupat na nga semana niyang paabot sa iyang gihangyo.

“Maayo kay nakapangutana ka. Di na lang nako isulti kun unsay pabor namong nahatag ninyo. Kay given na na. Kamo mismo nasayod ana. Kay kun sublion ko pa, nahulog na ko’g namuyboy. Apan makaingon lang ko nga one-sided atong relasyon. Pabor lang pirmi ninyo. Nangayo ko’g gamay’ng pabor, limotlimotan lang nimo” ni Celso sa tonong may pagmahay.

“Sorry gyud kaayo Pa. Pagkalimota gyud nako. Karon dayon moadto ko’g Internet Cafè. I-print ko tong imong mga kantang gi-request” ni Jimmy. Gihapak iyang kaugalingong agtang. Nisirit og lakaw.

Apan hilom nga nituaw si Celso. “Sa mga tiguwang, kulang na gyud ang pagtagad sa mga batan-on. Wa nay importansiya ang tiguwang. (Kataposan)