Bar girl

Gula 2

Milabay ang mga adlaw, miagi na usab si Delfin didto sa V. Rama Avenue ug bisan dili pa kaayo hugaw ang iyang sakyanan apan mituyo gayud siya sa pagpahugas didto sa car wash. Buntag gihapon siya nga nagpahugas sa iyang motorsiklo. Apan ang tuyo ni Delfin nga makit-an na usab niya si Leny nga wala niya damha nga nakabihag sa iyang pagbati.

Samtang gihugasan ang motorsiklo ni Delfin, ang iyang mga mata kanunay’ng nagpasiklap didto sa atbang nga balay nga gipuy-an ni Leny. Taud-taud, miabot na usab ang tigbaligya’g puto maya. Miorder dayon og puto maya si Delfin. “Asa na man kadtong imong amiga nga bar dancer bai?” gisukna ni Delfin ang tindero’g puto maya.

“Naa ra to diha Sir, moari to ron inigkadungog sa sirbato niini’ng akong gibitbit nga patingog,” matud sa tindero. Tuod, wala mosipyat kay migawas dayon si Leny pagkadungog sa sagunson nga pagpatingog sa tindero sa iyang sirbato.

Gingisihan kini ni Delfin diha’ng nakatabok na si Leny sa karsada. “Hi, good morning Len,” timbaya ni Delfin sa dalaga. Wala dayon mobawos pagtimbaya si Leny kang Delfin. Nakabantay si Delfin nga ingon sa nakalimot si Leny kaniya. “Dalia ra nga makalimot uy sa akong amiga,” giingnan niya ang dalaga.

Gitutokan ni Leny si Delfin. Dayon mibathay sa iyang mga ngabil ang matam-is nga pahiyom tingali nakahinumdom na kang Delfin. “Husto tuod, ikaw man diay kadto’ng naglibre nako og puto-maya sa miagi’ng semana. Maayo kay makalibre na ‘sab ko karon,” ni Leny pa.

“Wala’y problema Len, bisan og adlaw-adlawon pa nato nga pahatdan tika’g puto-maya niini’ng atong amigo,” dali nga tubag ni Delfin. “Pwede ba mangayo sa imong contact numbers Len?” matud ni Delfin nga mitunol dayon sa iyang touch screen nga selpon.

“No problem,” matud ni Leny nga midawat dayon sa selpon ni Delfin ug gipindot-pindot sa dalaga. “Bar girl ang akong gibutang nga ngalan diha sa imong selpon,” giingnan ni Leny si Delfin. Nagpatuso-tuso si Delfin aron ingon nga wala siya masayod nga sa bar magtrabaho ang dalaga.

“Ngano’ng bar girl man Len?” ni Delfin pa. “Sa bar man gud ko nagtrabaho mao nga bar girl ang akong gibutang,” matud ni Leny. (Sumpayan)