Isla Paraiso - Gula 201

Si Rey niining tungora, samtang nakigsangka sa mga kaaway, ingon sa nahikalimot na nga may kamatayon ang tawo. Gihurot niya ang tanan niyang kaisog sa pagpakigpinusilay sa mga tawo nga midagit kang sister Veronica. Maoy diha kanunay sa iyang hunahuna ang dakong tinguha nga maluwas ang madre nga iyang gihigugma. Bahala na’g unsay mahitabo kaniya. Total wala nay bili alang kaniya ang iyang kinabuhi karon nga giputol na ni sister Veronica ang ilang relasyon. Puwede na siyang mamatay human unya niya maluwas sa kakuyaw ang madre nga iyang gimahal. Ikapamatuod na niya sa hingpit ngadto kang sister Veronica kun unsa ka dako ang iyang paghigugma niini.

“Bang! Bang! Bang! Bang! Rat-tat-tat-tat-tat-tat!

Lain na usab nga mga bala sa kamatayon ang gibuga sa Uzi ni Rey. Wala santoha niini ang mga kaaway nga nangaigo sa iyang pagpusil. Nanglit-ad sila ug dihadiha nakabsan sa gininhawa.

Nagpasalamat si Rey nga dili kaayo ngitngit ang sulod sa maong bodega. Ingon sa gituyo sa mga kaaway ang pagpasiga sa mga suga sulod sa bodega aron kaha dali ra siya nilang malikida.

Apan nasayop sila sa ilang plano, nakaingon si Rey. Ang kahayag sa mga suga sa sulod sa bodega nakatabang hinuon kaniya sa sayon nga pagluthang sa mga kaaway. -- Sumpayan pa