Romansa ug pag-eskuwela

Gula 5

Nahinayon gayud ang pag-uban ni Abel sa ilang dapit ni Rowena didto sa lungsod sa Borbon. Mao diay nga dili mahutdan og panggasto ang magsuon nga si Rowena ug Lester kay arang-arangan man diay ang ilang pagkabutang.

Nakapanag-iya og lapad-lapad nga katubhan ug kalubihan sila si Rowena. Giabi-abi og maayo si Abel sa mga ginikanan sa dalaga kay gitug-anan man ni Lester nga nakatabang si Abel nga mitaas ang grado sa iyang igsuon.

Tungod kay bisi man si Lester sa pakig-uban sa iyang mga barkada, si Rowena mao g’yud ang miabi-abi ni Abel. Kauban sa pipila ka babaye’ng barkada, naglamaw sila si Rowena og butong, dayon nangaligo sa dagat. Sa laktod lingaw kaayo si Abel sa iyang pagbakasyon.

Usa ka buntag, pagmata ni Abel didto siya milingkod sa lingkoranan nga nag-atubang sa bukid. Nahinumdom siya sa iyang mga ginikanan didto sa ilang dapit. Tingali naghuna-huna na sila kun ngano nga wala pa siya makapauli.

Gisabot na lang ni Abel ang kapakyas sa iyang mga ginikanan pagpadala kaniya’g kwarta nga magamit sa dayon na nga pagtapos sa pagtuon karong tuiga. Swerte gani kay gibayran ra usa ni Rowena ang iyang advance rental sa gipuy-an.

“Good morning Abel. Gidad-an tika og coffee ug budbod,” matud ni Rowena nga mikalit lang pagbutho sa iyang likod. “Salamat Wen, nagtagad ka pa g’yud. Mosamot nga maikog ko nimo pag-ayo,” matud sa ulitawo.

Nagkatinutokay sila si Rowena ug Abel. “Bisita ka gud nako mao nga atimanon ka g’yud,” matud sa dalaga. “Tinuod ba nga wala ka pa’y boyfriend Wen? Duha ka adlaw na man gud ko dinhi, wala ko makabantay nga adunay mianhi aron pagpangumosta nimo,” matud ni Abel.

“Giingnan na bitaw tika nga wala ko’y boyfriend,” ni Rowena nga nagpahiyom nga mitutok sa ulitawo.

Pastilan, kun managsama pa ang atong kahimtang, magpakatakos unta ko sa pagpangambisyon sa imong gugma, apan unsaon man dili kita angayan, pobre ko,” matud ni Abel. Milingkod si Rowena atbang ni Abel. “Ayaw paghuna-hunaa ang kahimtang Abel, ang mahinungdanon kun ang duha magkasabot ug matuod gayud nga nagminahalay,” abtik nga tubag ni Wenna.

“Kun mao, dili ka masuko kun manguyab ko nimo Wen?” ni Abel pa nga nakapahet sa iyang ubos nga ngabil samtang gitutokan niya si Rowena aron sutaon ang iyang reaksyon. (Sumpayan)