Panaghigala

Pagsulod ni Rudy sa elevator sa ospital kay mosaka siya sa 7th floor diin tua ang lawak ni Adela iyang kapikas, nibagting iyang selpon. Gikuot niya sa walang bulsa sa karsones.

“Hello” niya pa. “Hello pre, naa ka’s opisina ron?”

“Nia ko’s ospital ni Rudy.

“Kinsa may na-admit?” ni Dante.

“Si Adela. Si kumare nimo,” ni Rudy.

Daghan nang mga tawo nisulod sa elevator ning buntaga. Nisira na. Ug nisaka.

“Unsa may sakit niya pre?” sa pikas linya. “Unya na lang ta mag-estorya ini’g abot nako sa lawak niya pre. Nia pa ko’s elevator,” ni Rudy, 55 anyos, usa ka CPA.

May diperensiya sa kasingkasing si Adela. Abnormal ang pinitik niini. Modoble ang gikusgon sa pinitik. Mosakit iyang dughan. Maglisod siya’g ginhawa.

“Iteks lang nako haing ospitala pre ug room number. Kay moanha dayon ko,” sa pikas linya. Giteks ni Rudy.

Pag-abot ni Dante sa lawak sa ospital, nagdala og garapa nga may sulod nga mga kapsula. Gihatag niya kang Rudy.

“Patomara unya si mare ana pre. Ini’g gawas niya sa ospital. Ay la’g ipahibawo sa doctor nga duna ko’y gihatag tambal,” ni Dante. Gidawat ni Rudy.

“Salamat kaayo pre,” ni Rudy.

Dili pa ma-estorbo si Adela kay natulog ug di ipapukaw sa doktor.

Nibiya na si Dante pagmata ni Adela. Gihatag dayon ni Rudy sa kapikas ang garapa. Gisulod ni Adela sa iyang bag. Lima ka adlaw siya sa ospital.

Dangta’g usa ka semana sukad nahiuli sa balay si Adela, nitawag sa telepono si Dante. Si Rudy ang nakapunit sa telepono.

“Kumosta na man si mare Adela, pre?” ni Dante. “Maayo na man pre. Pero duna na gyu’y gipamintin nga tambal,” ni Rudy.

“Gitumar ba niya ang akong gihatag kadtong gisulod sa garapa nga herbal capsules?” ni Dante.

Nilingi si Rudy sa iyang kapikas nga nagtan-aw og telebisyon sa ilang sala.

“Gitumar ba kuno nimo ang iyang gihatag?” hunghong ni Rudy. Dugay nakatingog si Adela.

“Akong gilabay. Expired na!” hunghong niya. “Gitumar niya pre. Niya pa, salamat kaayo. Niarang-arang iyang paminaw pagtomar sa imong gihatag pre,” ni Rudy. Nanigang mga mata ni Adela.

“Ako lang gibakakan. Kay lisod nang mahiubos si kumpare. Mawad-an unya ta’g dakong retainer,” ni Rudy.

“Ingon diay ana ang panaghigala?” tuaw sa hilom ni Adela. Nanghupaw. (Kataposan)