Romansa ug pag-eskuwela - Gula 4

Wala makabalibad si Abel sa pagdapit ni Rowena nga makigpanuroy kaniya. Gipasabot siya sa dalaga nga malipay g’yud ang iyang mga ginikanan nga taas ang nakuha niya nga grado tungod sa kanunay nga pag-abag ni Abel.

“Hain ang maayo kun adto ka sa among dapit mouna sa pagbakasyon Abel? Pwede ka moestar og pipila ka adlaw didto sa among lugar usa ka mopauli sa inyo,” matud ni Rowena.

Nakahinuktok si Abel. Nahuna-huna man gud niya nga panahon sa bakasyon motabang man gayud siya sa iyang ginikanan pagtikad sa ilang uma. Gitug-an niya kini ngadto ni Rowena.

Misamot ang pagdayeg ni Rowena ngadto ni Abel nga nakatugkad sa iyang kabuotan. “Estar lang gud og pipila ka adlaw sa amo Abel. Sige na, ayaw ko balibari,” daw nagpakiluoy si Rowena sa iyang suod nga amigo.

Nakasabot si Rowena nga ang pagdiki-diki ni Abel mao nga wala siya’y panggasto. “Kami na si Manoy Lester ang bahala sa tanan nimo nga gastohan pagpauli sa inyo gikan ka sa amo Abel,” giingnan ni Rowena ang ulitawo.

Tuod wala gayud makabalibad si Abel, mitando kini nga mokuyog sa ilang probinsya ni Rowena didto sa Tuburan. Nanglarga dayon sila pagka-ugma sa buntag.

Nagtupad pa sila si Rowena ug Abel sa paglingkod sa bus nga ilang gisakyan paingon sa lungsod sa Tuburan.

“Kaswerte sa imo nga mapangasawa Abel no, kay gawas nga bright ka, kugihan pa g’yud kay matud nimo sa bakasyon motabang ka pa sa pagbaol,” ni Rowena.

“Mao lagi, apan ang problema kun may babaye ba nga mosugot nako pagka karon nga maglisud man gani ko pagpakaon sa akong kaugalingon… labaw na sa uyab,” daw nangomedya si Abel. Nakakatawa si Rowena nga nakadungog sa gisulti ni Abel. “May girlfriend ka na ba Abel? Wala man gud ko makabantay nga may moanha kanimo sa boarding house sama sa uban mo nga mga barkada,” gisukna ni Rowena si Abel.

Abtik kaayo nga mipasabot si Abel nga gawas nga mauwaw siya nga manguyab kay walay ikagasto bisan sa pang-snack sa iyang maibgan, gusto niya nga dili kini makaapekto sa iyang pagtuon.

 â€œIkaw Wen, may boyfriend ka na ba?” bawos-pangutana ni Abel. “Wala pa lagi, basin makatabang ka nga makauyab ko.. joke  ra bitaw,” matud ni Rowena nga nagngisi.. (Sumpayan)