Isla Paraiso - Gula 198

Naabtan ni Rey si Corporal Benturada nga naglingkod sa atubangan sa usa ka lamesa diin may telepono nga gipatong sa ibabaw niini. Nagdukaduka ang korporal.

“David,” gisangpit ni Rey ang korporal.

“S-Sir!” Midali pagsaludo si Korporal Benturada nga nahikuratan sa pag-abot ni Rey. Mora kini’g gialimungawan.

“Hain ang yawe sa service jeep, David?”

“Dia ra, Sir,” ni Benturada nga milukab sa hunos sa lamesa ug gikuha ang yawe. Gitunol kini sa korporal ngadto kang Rey.

“Kun may mangita kanako,” ni Rey pa human dawata ang yawe,” ingna nga may gilakaw ko.”

“A-asa ka man diay, Sir, nga gabii na man ron?”

“May mahinungdanon akong adtuon.”

“Unya, Sir, ang bahin sa pagkidnap kang sister Veronica?”

“Unya na kita magsulti mahitungod niana.

Ug gitalikdan na ni Rey ang korporal nga wala makalihok sa iyang gilingkoran. Gisundan niya pagtan-aw  si Rey hangtod nga nakagawas na kini sa pultahan. Wala madugay, nabati niya ang andar sa makina sa sakyanan nga milarga.

Gipaspasan ni Rey ang pagpadagan sa dyip. Ang iyang hunahuna gigamhan na sa kahigwaos ug kabalaka. Gusto siyang makaabot gilayon sa dapit nga maoy gidad-an sa mga kidnaper kang sister Veronica.

Hapit na lang palupdon ni Rey ang iyang gisakyan. (Sumpayan pa)