Isla Paraiso
Gula 197
Pangunayan ni Rey ang pagluwas kang sister Veronica. Duha ka kusganong puwersa ang nagtukmod kaniya sa paghimo sa ingon. Ang iyang katungdanan ug ang iyang gugma ngadto sa madre. Mao nga dili makatugot ang iyang tanlag nga pasagdan na lamang nga mahulog sa kaalaotan si sister Veronica sa mga kamot sa tawong daotan.
Wala mag-usik og panahon si Rey. Dihadiha migawas siya sa balay. Pasado alas onse na sa kagabhion. Wala’y usa nga nakamatikod sa iyang paggawas.
Karon misantop sa hunahuna ni Rey nga kinahanglan niya ang usa ka sakyanan aron siya makaabot gilayon sa dapit nga gisulti sa kidnaper nga iyang gikahinabi sa telepono dili pa lamang dugay. Maoy iyang nahunahunaan ang sakyanan sa kapolisan. Husto, mao kadto ang iyang gamiton.
Naghulat siya’g taksi aron magpahatod ngadto sa presinto 10. Apan talagsa na lang ang mga sakyanan nga nagdagan sa kadalanan gumikan sa kalawom na sa kagabhion. Milungtad pa og pito ka gutlo usa siya makasakay.
Gimandoan niya ang drayber nga adto siya ihatod sa presinto 10.
Paghunong nila tungod sa presinto, gibayran gilayon ni Rey ang drayber sa kantidad nga giyamar sa metrohan sa taksi. Dayon midiretso siya pagsulod sa buhatan sa kapolisan. Nagdali siya. Gilabyan lang niya ang duha ka polis nga nagbantay sa pultahan sa presinto niadtong gabhiona nga mitimbaya sa iyang pag-agi. Gipangita niya si Corporal David Benturada. (Sumpayan pa)
- Latest
