Isla Paraiso

Gula 196

“Mga hayop kamo!” ni Rey nga gigamhan na sa tumang kalagot. “Kun tinuod kamong maisog pakigsangka kamo kanako!”

“Moabot kita nianang puntoha, SPO3 Corpuz,” matud sa kidnaper. Kun gusto mo pang makitang buhi si sister Veronica, paningkamoti nga maluwas mo siya!”

“Hain man ang inyong nahimutangan karon?”

Si SPO3 Rey Corpuz daw nagpugong sa iyang pagginhawa samtang ang kidnaper nga iyang gikasulti sa telepono mitug-an kun hain nila dad-a si sister Veronica. Gikuha gayod niya ang tukma nga lokasyon sa dapit nga gitug-an sa kidnaper.

“Apan timan-i kini, SPO3 Corpuz,” mipahimangno ang kidnaper. ‘Ayaw gayod pagdala og kauban. Mag-inusara ka lang sa imong pagluwas kang sister Veronica. Ug kinahanglang walay usa sa imong mga kauban nga masayod nga nagsulti kita karon. Tin-aw ba?”

“Oo,” ni Rey pa.

“Good,” nahimuot ang kidnaper. “Buyno, paaboton ka namo. Gipaabot ka usab ni sister Veronica.”

Ug naputol na ang linya.

Wala sa hunahuna nga milingkod si Rey sa ngilit sa iyang kama human niya makasulti ang kidnaper.

Unsay iyang buhaton karon? Kinahanglang maluwas niya ang madre?

Bahala na? Hunghong ni Rey sa iyang kaugalingon. -- Sumpayan pa