Ang relihiyoso

Kun hunahunaon, usa na tingali kining akong higala nga si Dindo ang labihan kaayo ka pagka relihiyoso. Halos,  kun baskog lang ang iyang lawas, dili gayud siya mopalta kun dunay misa sa simbahan ug sa matag simba duna gayud siya’y igahin nga sapi para ihalad sa nag-alagad sa simbahan.

“Nganong mohatag ka man og limos, Bay, diha sa taga simbahan nga daghan man sila’g kuwarta,” pangutana ko sa akong higala. “Sama sa Pari nga usa lang ka misa, dako man ang iyang kuwarta.”

“Tinuod kana nga daghan sila’g kuwarta, apan kanang kuwartaha, dili kana ilang kaugalingon kun dili iya sa Diyos,” tubag ni Dindo ngari kanako. “Busa, pasagdi lang ako ninyo kun mahurot ang akong kuwarta para ihatag sa Pari.”

Sa akong bahin, motuo man usab kita’g Diyos apan sa akong pagtuo, sobra ra kaayo ang pagkarelihiyoso ni Dindo. Ulitawong gulang si Dindo ug dayag na lang nga duna usab siya’y kuwarta tungod sa katigayonan nga nasunod niya sa iyang katigulangan. Apan, nagpuyo siya sa tumang ka simple sa kinabuhi. Kuripot kaayo ang iyang pagkatawo. Bisan sa pagkaon, kuripot gihapon siya.

“Nganong dili ka man mopalit para sa imong pagkaon?” pulong sa usa sa among higala.  “Kun ang Diyos nagpuyo dinhi sa kalibotan sa tumang ka yano sa kinabuhi, ako pa,” tubag ni Dindo.

Sulod sa among barangay, si Dindo ra gyod ang tawo nga halos ang tanang kapunongan sa simbahan ang gitampohan. Sakop siya sa Knight of Columbus, Parish Men’s Sodality ug uban pa, ug kining tanang kapunongan nga iyang gitampohan, naningkamot gayod siya nga makaalagad.

Usa ka adlaw, dunay gibati nga problema sa lawas si Dindo. Nagkapuliki intawon si Dindo pagpalit og tambal para sa iyang sakit. Apan tungod lagi kay pobre, wala gayod siya makapalit og tambal. Kadtong mga sakop sa ilang kapunongan, wala man moduol kaniya para siya matabangan. Hangtod nga namatay si Dindo nga nag-inusara diha sa iyang balay.

Masakit nga kamatayon ang nahiaguman ni Dindo. Dinhi ako makaingon nga pait gayod diay ang usa ka tawong kabos kay halos walay moduol kaniya panahon sa iyang kasakit. Mao kini si Dindo nga nag-alagad sa katawhan pinaagi sa simbahan apan mora’g nahikalimtan siya panahon sa iyang kasakit. Kataposan