Kahidlaw sa babaye

Gula 6

Gihuwat g’yud ni Herbert si Charina. Nag-ilis si Charina ug nagkuyog sila pagpanglakaw paingon sa basketball court sa Sitio Perlas.

Layo pa gani sila, nalantawan na ni Herbert ang iyang mga barkada nga nagngisi ug pwerte nga nakatutok kanila ni Charina nga nag-ampad sa pagpanglakaw. “Kaswerte gud nimo part nga nakakuyog sa guwapa nimo nga naibgan,” matud ni Lemuel.

Wala kapugngi ni Herbert nga napaak niya ang ubos niya nga waet kay wala siya magdahom nga litukon kadto sa iyang amigo. Wala man gud malilong sa mga barkada ni Herbert ang iyang kaibog kang Charina.

Gipasiplatan ni Herbert si Charina aron pagsuta kun unsa’y reaksyon niini sa gisulti sa iyang amigo. “Swerteha nimo part uy,” dason sa laing barkada ni Herbert nga si Leo.

“Ayaw mo’g tinonto diha part kay basin masuko unya ni si Charina ug dili na ko tagdon,” mapaubsanon ang tingog ni Herbert. “No problem uy. Ana man g’yud na ang magbarkada, magkomedyahay,” ni Charina.

“Dili tawon na komedya Char ang iya’ng kaibog nimo,” matud ni Leo. Wala na makatingog ug daw nasud-ipan si Herbert ilabi na diha nga gitutokan siya ni Charina nga nagpahiyom.

Taud-taud, gisugdan ang duwa nila ni Herbert. Grupo nga taga Labangon ang ilang gikasangka. Pwerte nga nakasinggit ni Charina ug sa mga barkada niya nga dalaga sa mata’g higayon nga makapasulod og bola si Herbert sa ring.

Ingon usab sa migara si Herbert nga miabiba kaniya si Charina. Gihurot niya pagpakita ang iyang abilidad. Si Herbert maoy sikat nga player sa ilang grupo. Gipilde gayud nila ang ilang kontra bisan og mas tag-as pa kini kanila.

“Maayo ka man diay nga moduwa Bert,” matud ni Charina nga mapahiyumon. “Siya maoy amo’ng star player Char, apan ang nakadaot lang ani niya kay dili makasulti sa iya’ng gibati nimo,” nangomedya na usab si Leo. “Bitaw, ngano’ng mauwaw man motug-an kun tininuod lang,” daw misukol sa komedya si Charina ug nakapahugyaw sa magbarkada.  Usa ka barkada nga babaye ni Charina mitug-an nga adunay disco sa ilang sitio unya sa gabii.

Nagkasabot na usab ang magbarkada nga mang-disco. “Kuyog ta unya Bert ha kay wala ko’y kauban. Agia lang ko sa balay,” giingnan ni Charina si Herbert. Nagkuyog sila sa pagpauli. Malipayon si Herbert nga nasuod na kaayo niya si Charina. (Sumpayan)