Kahidlaw sa babaye - Gula 3

Nag-ukon-ukon si Herbert pag-adto sa tindahan nila ni Charina. Mauwaw siya nga makit-an sa dalaga nga pwerte niya nga nakatutok kaganina samtang si Charina nanghayhay sa iyang underwear sa hayhayan sa ilang balkon.

Apan wala’y mahimo si Herbert tungod kay ang laing tindahan nga namaligya og mga lamas tua sa mas layo pa ug anha gihapon moagi sa ila ni Charina. Nagpamahit sa iyang mga ngabil si Herbert samtang daw pinugngan ang mga lakang nga naglakaw paingon sa tindahan sa dalaga.

Layo pa gani si Herbert sa tindahan nila ni Charina, nalantawan na niya ang dalaga nga maoy nagbantay sa tindahan. Miuknol si Herbert ug ingon sa dili kaduolon. Apan nahuna-huna niya nga gipadali siya sa iyang inahan pagpalit og lamas kay nagluto na kini sa ilang sud-an para panihapon.

Namahala na lang g’yud si Herbert. Wala na siya’y lain nga mahimo. Samtang nagpaingon pa si Herbert sa tindahan, nalantawan na usab siya ni Charina. Wala makaharong si Herbert diha nga gitutokan siya pag-ayo sa dalaga.

“Papalita ko og lamas Char, singko pesos nga sibuyas, singko ‘sab nga ahos, sibuyas bombay dies ug tulo ka kamatis,” giingnan ni Herbert si Charina sa hinay kaayo nga tingog. Mitindog si Charina ug mikuha sa lamas nga giingon ni Herbert.

Nakahigayon si Herbert sa pagtutok ni Charina samtang kini nagtalikod. Gitutokan pag-ayo ni Herbert ang bat-ang ni Charina nga mihulma ang iyang gisul-ob nga panti. Kalit lang misantop sa huna-huna ni Herbert kadtong underwear nga gihayhay ni Charina kaganina.

Gitunol ni Charina ka’ng Herbert ang mga lamas nga gisulod sa silopin. “Dia ra Bert o. Ikaw ha, bilyako kaayo ka ganina kay pwerte nimo nga nakatutok nga nanghayhay ko sa akong underwear gikan nga naligo,” giingnan ni Charina si Herbert.

Daw natuk-an si Herbert ug wala makatingog. Ingon siya sa nakahilam-os og grabe nga kauwaw. Apan diha nga nakita niya nga mipahiyom si Charina, daw nahuwas-huwasan si Herbert. “Sori kaayo Char ha,” nangayo’g pasaylo si Herbert sa dalaga.

“Sige, oki lang,” matud ni Charina nga nagpahiyom gihapon. Mibiya dayon si Herbert sa tindahan nila ni Charina ug daw giluparan og langgam buntog nga paspas kaayo nga milakaw paingon sa ilang panimalay. Human ikahatag ni Herbert ang mga pinalit nga lamas ngadto sa iyang inahan, misirit siya sa iyang kwarto. Gikuha niya ang iyang gitagoan nga underwear sa babaye nga gikawat niya gikan sa hayhayan sa usa ka balay. (Sumpayan)