Gustong mahimamat

Dear Tita Salie,

Maayong adlaw. Ako si Renan, taga San Remegio, Cebu, 18 years old of age.

Sukad sa una wala gyod ko kakita sa akong amahan. Apan matud sa akong inahan nga taga Bakilid, Mandaue ang akong papa.

Tungod kay gusto nako nga mahimamat siya ako kining giadto apan ingon ang mga silingan nga mibalhin na og puyo, ug igo ra ko nila gihatagan og telephone number.

Dihang nagsige ko’g tawag sa telepono ang makatubag moingon nga milakaw, bisan kun nagpaila na ko nila. Dili sila interesado nako.

Ako na lang hunongon ang akong pagpangita sa akong amahan, Tita Salie o akong ipadayon. Unsa may maayo nakong buhaton? Palihog pasabta ko. Daghang salamat and more power.

* * *

Maayong adlaw,

Mas maayo gyod nga imong mailhan ug mahimamat ang imong amahan tungod kay dili gyod magmalinawon ang imong hunahuna hangtod nga dili mo siya makita karon nga nasayod ka nga anaa ra siya.

Dako gyod natong kalipay nga mailhan sila ug makita ug unya magakos bisan pa man kun wala nato sila makita sukad sa atong pagkabata. Busa ayaw panumbalinga ug ayaw hunahunaa kun humot ba ka sa ilang pamilya. Maoy huna-hunaa nga malipay ka tungod kay imong gikasulti ang imong papa.

Ayaw paghunong sa pagkontak kaniya, tungod kay mahitabo ra gyod nga imo ra siyang ikahimamat. Ang tawo nga dunay maayong laraw kanunay gyod nga tabangan ug panalanginan sa atong Diyos. -- Tita Salie