Isla Paraiso

Nahimuot si Col. Martin Villadar nga naghunahuna sa iyang gilaraw nga panimalos kang Rey. Hugot ang iyang pagtuo nga segurado gayod nga mahulog si Rey sa iyang mga kamot niining nahunahunaan niyang paagi.

Niana dayong adlawa, gipatawag ni Col. Villadar ang iyang mga sinaligan. Iyang gisultihan ang iyang mga sakop nga adto sila mag-abot sa iyang rest house nga nahigawas og diyotay sa dakbayan sa Sugbo. Nakatultol na niini ang iyang mga tawo. Nahiabot si Col. Villadar sa iyang rest house nianang pagkaudto. Didto na ang iyang mga sinaligan nga iyang gipatawag, gawas sa iyang mga tawo nga maoy nagbantay sa rest house. Kuyog ni Col. Villadar ang duha ka polis nga maoy iyang mga kaabag sa pagpadagan sa daotan nga kalihokan.

Hamugaway ang rest house ni Col. Villadar sanglit may igo kining gidak-on. Sagad nga anhi dinhi nila himoa ang pagbinahinay sa salapi human sa malampuson nilang operasyon -- kidnap-for-ransom man kini o panulis. Luwas sila sa maong lugar. Nalayo kini sa kabalayan. Ang koronel maoy tag-iya sa kapin sa lima ka esktaryang yuta ug sa masigka utlanan niini, anha na makita ang kabalayan. Busa hilit ang nahimutangan sa rest house. Haom kaayo sa hilom niyang dautang kalihokan.

Sa sala sa rest house, gipakigsultihan ni Col. Villadar ang iyang mga tawo. Milabhag pa sa iyang mga nawong ang tumang kalagot sa nahitabo sa iyang mga sinugo sa pagtulis sa usa ka banko  nga nahurot pagpatay sa mga polis nga gipangulohan ni SPO3 Rey Corpuz. -- Sumpayan pa