Isla Paraiso - Gula 187

May mga reporter nga nakadayeg sa gipakitang kaisog ni Rey sa pagpakigsangka sa mga tulisan.

Sa mga estasyon sa radyo, milanog usab ang ngalan ni SPO3 Rey Corpuz. Gidayeg sa mga tigbalita ang talagsaon niyang katakos sa pagpakigsangka sa mga tawo nga milapas sa gimbut-an sa balaud.

Apan luyo niining tanan, may tawo nga nibati og dili tiaw nga kayugot ngadto kang Rey. Si Col. Martin Villadar. Wala niya ikahimuot ang gibuhat ni Rey. Usa ka dautang laraw alang kang Rey ang natawo sa iyang hunahuna. Nanganti siya nga makapanimalos kang Rey. Kinahanglang mapapas sa nawong sa yuta si Rey, ang tawo nga maoy responsable sa kamatayon sa iyang mga binuhi nga mga tulisan!

Alang kang Col. Villadar, dako nag kadaut nga nahimo si Rey sa pundok nga iyang gipangulohan nga maoy utok sa mga kidnap-for-ranson ug panulis nga nahitabo sa dakbayan. Daghan na ang napatay ni Rey sa iyang mga tawo. Ug kun magkanunay kini, mahurot ang iyang mga tawo sa kadugayan.

Samtang sayo pa, kinahanglang mamatay na si Rey! Nagpaminti siya sa kalagot samtang nakigsulti sa iyang kaugalingon. Unya may usa ka ideya nga misantop sa iyang hunahuna. Wala malilong kaniya ang pagpangulitawo ni Rey kang sister Veronica. Wala hinuon siya masayod kun nagka-uyab na ba ang duruha. Apan iyang nahunahuna nga magamit niya ang maanyag nga madre alang sa iyang laraw sa pagpanimalos kang Rey. -- Sumpayan pa