Na in-love og pari

Paingon nga mosuroy si Sheena sa usa ka dako’ng mall sa north reclamation area. Apan nakahuna-huna siya nga mohapit usa og simbahan aron maminaw og misa.

Alas singko sa hapon pa ang oras nga gikasabotan nila ni Elmer nga magkita sa dakong mall. Una kini nga higayon nga makigpanuroy si Sheena kang Elmer human sila magka-away ug misangpot gani og cool-break sa ilang relasyon.

Nagsugod na ang misa pagsulod ni Sheena sa simbahan. Mikuliot siya sa daghang mga nanimba aron mahiduol siya dapit sa may altar. Nag-ampo si Sheena. Giduko niya ang iyang ulo samtang nagkitabkitab ang iyang mga ngabil samtang militok sa mga pulong sa pag-ampo.

Human makapangadye si Sheena, nanguros siya ug miyangad. Gilantaw niya ang pari nga nagmisa didto sa altar. Wala makasabot si Sheena sa iyang gibati pagkakita sa nawong sa pari. Ambongan si Fr. Jonas, batan-on, mao nga wala kalikayi ni Sheena nga mobati og kaibog sa pari.

Apan gipakgang niya ang iyang kaugalingon nga dili tukma nga higugmaon niya ang pari. Kanunay g’yud tutokan ni Sheena si Fr. Jonas. Hangtod nga gihimo ang pagpangalawat. Nagpabilin nga nagbarog si Sheena sa iyang gitindogan.

Gitan-aw usa niya kun asa nga linya si Fr. Jonas mopapangalawat. Didto si Sheena molinya aron ang pari gayud maoy makapangalawat kaniya.

Samtang nagkaduol si Sheena sa pari, didto ra sa alagad sa dios ang iyang tinan-awan. Miabot na g’yud ang torno ni Sheena. Gidalitan ni Sheena og tam-is kaayo nga pahiyom ang batan-ong pari.

Mibawos sa pagtutok kang Sheena ang pari sa wala pa kini mihungit kaniya sa osteyas. Sa wala pa motalikod si Sheena aron mobalik siya sa iyang gitindogan, gisud-ong pa gayud niya ang pari. 

Nakabantay ang pari sa gipakita nga lihok ni Sheena. Lain kaayo ang gibati ni Sheena niadto’ng higayona. Dili niya malimdan ang iyang kaugalingon nga naibog siya sa pari. Nakahinumdom siya sa komedya nga usahay iyang madunggan nga adunay ubang pari nga mga tsikboy kaayo. Gihuman gayud ni Sheena ang misa ug gibusog niya pag-ayo ang iyang mga mata sa pagsud-ong sa pari.

Human sa misa, migawas si Sheena sa simbahan ug diha pa niya masuta nga daghan na diay kaayo’ng text messages gikan sa iyang boyfriend nga si Elmer.  Wala niya gi-reply ang text messages ni Elmer nga nasabot niya nga mora’g napikal na nga wala siya motubag. (Sumpayan)