Ang bayot ug tomboy

Kanunay na nga magkuyog pagpanuroy sila si Macky ug Mayet. Nakabantay si Macky nga naninguha g’yud si Mayet nga dili na siya maora’g tomboy manglihok-lihok.

Nalipay kaayo si Macky kay sa panag-uban nila ni Mayet, anam-anam na nga nakalimtan niya ang masakit niya nga kasinatian sa gugma human siya gitalikdan sa iyang boyfriend.

Usa ka higayon sa pagpanuroy nila ni Macky ug Mayet sa department store, sulagma nga gikahinagbo nila si Rose nga may kauban nga babaye. Nakurat kaayo ang ilang higala’ng tomboy sa iyang nakita. Daw dili makatuo si Rose nga si Mayet, ang kauban niya nga tomboy kaniadto, babaye na kaayo tan-awon sa iyang panapot nga gisul-ob samtang si Lovena nga usa ka bayot lalaki na usab kaayo ang pamayhon.

Naglisod pagpasabot sila si Macky ug Mayet ngano’ng naingon sila niini tungod kay si Rose adunay kauban nga babaye nga nagpalayo lang kanila kay gibati tingali og kauwaw nga nanguyab og tomboy. “Hala ka Mayet uy, gwapa ka na g’yud kaayo. Si Lovena ‘sab kaniadto gwapa, pero karon gwapo na ‘sab,” ni Mayet pa. “Tawga na ko sa tinuod nako nga ngalan, Macky. Gibiyaan ko na ang kanhi nako pagpakabuang Rose,” ni Macky pa. Human sa hamubo nga paghangpanay, nagbuwag-buwag ra ang kanhi maghigala. “Luoy tawon si Rose kay igo lang kadto hantukon niadtong babaye nga iyang girlfriend,” matud ni Mayet nga milingi kadiyot sa iyang amiga’ng tomboy.

Gabii na sila nga nanggawas sa mall. Gituyo nila nga magpagabii kay init kaayo sa gawas kun panahon sa adlaw. “Ayaw na lang ko ihatud Mack kay mahasol ka na,” giingnan ni Mayet si Macky. “Ayaw, ihatod ko ikaw kay babaye ka’ng buhat ug gabii na karon,” ni Macky nga miagbay ni Mayet samtang nagpaabot sila og taksi gawas sa mall. “Kanindot diay kun tinuod ta nga babaye no? Unya may lalaki nga mopangga nato,” matud ni Mayet nga nakapahiyom.

“Bitaw, nindot usab kaayo huna-hunaon ang kinabuhi sa usa ka lalaki nga higugmaon sa matuod sa usa ka babaye,” abtik nga tubag ni Macky. Kalit sila nga nahilom.

Misakay sila’g taksi ug nagtupad paglingkod ang managhigala sa likod nga lingkoranan. Pag-abot nila sa boarding house ni Mayet, una nga nanaog si Macky ug gigunitan niya ang kamot ni Mayet sa dayon niini nga paggawas. “Hapit usa sa boarding house Mack,” agda ni Mayet sa suod kaayo niya’ng higala. Giandaman ni Mayet si Macky og juice drink. Nagtupad sila pagpanglingkod.

“Kadako sa kausaban sa atong kinabuhi no?” giingnan ni Mayet si Macky. (Sumpayan)