Ang bayot ug tomboy

Gula 5

Human sa pipila ka gutlo nga paghinuktok, misaad pag-usab si Mayet kang Macky nga paninguhaon niya ang pag-usab sa kaugalingon ug biyaan na ang pagka tomboy.

“Bitaw, husto ka Macky, dako na tuod kaayo ko og nagasto sa mga nahimo ko’ng girlfriend apan sa ngadto-ngadto, ila ra gihapon ko nga gibiyaan,” matud ni Mayet. “Susama kita Mayet nga daku na usab kaayo og nagasto sa ako’ng mga boyfriend kaniadto. Gigastohan g’yud nako apan gibiyaan ra gihapon ko,” sagbat ni Macky.

“Tabangi ko Macky nga mausab nako ang akong pagkatawo. Husto ka, kinahanglan nga biyaan na nato ang atong mga kabuang,” matud ni Mayet. Tuod, gitambagan ni Macky si Mayet nga dili na magsul-ob og mga sapot nga linaki.

“Manuroy ta Mayet para makalimtan nato ang atong mga problema ug gusto ko nga magsul-ob ka og binabaye. Usba apil ang imong sinultihan. Himoa nga paraygon ang imong tingog,” matud ni Macky.

Nakapahiyom si Mayet nga nakadungog sa tambag kaniya ni Macky. Naligo si Mayet ug pagkahuman, nag-andam sa iyang kaugalingon sulod sa iyang kwarto. “Pagpaanyag g’yud day ha? Kanang dili ka na tomboy tan-awon,” ni Macky pa.

Naghinuktok si Macky sa sala samtang nagpaabot siya ni Mayet. Gihuna-huna niya ang iyang kaagi uban sa mga kanhi niya boyfriends. Sa hilom, gikasilagan ug gikauwaw ni Macky ang iyang pagkabayot. Taud-taud, migawas si Mayet gikan sa iyang kuwarto. “Oki na ba kini’ng akong pamustora Mack?” matud ni Mayet nga nagpahiyom. May lipstick na ang mga ngabil ni Mayet, ug may gamay’ng pulbos na ang iyang aping. Binabaye na usab ang pagkasudlay sa iyang buhok.

Daw natulala si Macky nga nagsud-ong sa kaanyag ni Mayet. “Daan pa g’yud ko Mayet nga gwapa ka kaayo basta magbinabaye na,” dayeg ni Macky sa higala samtang padayong mitutok ni Mayet. “Lupig ko nimo sa una uy, mas gwapa kaayo ka dihang Lovena ka pa Mack,” abtik nga tubag ni Mayet. “Please, ayaw na kadto hinumdomi,” matud ni Macky. Nagkatawa si Mayet. “Gwapa kaniadto pero karon milutaw na usab ang imong kaambongan nga pagka lalaki,” ni Mayet. Nagkataw-anay sila’ng duha.

“Sigurado day nga daghang mga cats nga mapandol sa imong kaanyag karon nga nakakita na sila sa matuod mo nga kagandahan,” dugang dayeg ni Macky.

Sila si Macky ug Mayet ang nagkuyog-kuyog  tibuok adlaw. Dunay mga higala nila nga ilang nasugatan nga wala na makaila kanila tungod sa bag-o nila nga kausaban sa panapot ug pamustora (Sumpayan)