Si Tibur ug ang babayeng mangtas

Naibog si Tibur kang Catalina ug kini dugay na. Nagsukad pa niadtong adlaw sa pag-abot sa pamilya nila ni Catalina dinhi sa sityo Ugis-Unggoy. Daghan ang nagtuo nga mga estrikto ang pamilya nila ni Catalina kay dili man magtingog-tingog kun imo silang hisugatan sa dalan.

Busa, si Merto ang konsehal dinhi sa baryo Tunoktunok gibati’g kalagot sa pamilya nila ni Catalina. Kaguwapa ra ba ni Catalina ug guwapo usab ang duha niya ka igsuong lalaki nga sila si Intok ug Poloy, maayong pagkaliwat ni Doroy nga ilang amahan.

Ang asawa ni Doroy nga Malta bati kaayo’g nawong ug daghang nahibulong nganong kini maoy gipangasawa ni Doroy. Tingali, nahigugma si Doroy sa hitsura ni Malta kay nagpakasal man siya niini. Taga isla Pulong Litub kuno sila si Catalina.

“Grabeha sad og mga batasan nang atong bag-ong silingan, uy, Tibur, mora ma’g wala kaila nato nga ilang mga silingan. Dugay na gud nato silang silingan apan kun imong masugatan modayog dukoduko nga nagpasabot nga dili gusto’g makigsilingan...” ni Merto pa.

“Okey man sila, Konsehal, magtabi man gani ming Catalina kanang magkawos ko’g tubig sa tubod ug maatol nga naa pud si Catalina nga magkuha’g tubig,” ni Tibur pa. Kini si Tibur, anak nilang Valintin-Tanang nga manindahay og tabako sa tabo sa Likoan. Ug adunay kumbira dili gyud kini siya mosipyat sa pag-adto aron mamista. Mao bitaw nga dakuon kini siya nga pagka-ulitawo ug mibudlot ang buy-on sa iyang tiyan. Unya usa ka hapon giimbitar siya ni Catalina sa ilang balay kay iya kunong birthday. Pagkabati ni Tibur nga duna diay salusalo sa balay nilang Catalina, nagyapayapa dayon kining mitando. “O, oo, o, adto ko sa inyo, Tal, kanus-a man na, ha, Talina?” ni Tibur pa.

“Ug happy birthday diay, wala ra ba ko’y ikaregalo nimo, Tal, sayod kana, wa koy trabaho...”

“Okey lang na, uy, Tibur. Ang importante nga tua ka gyud didto sa amo ugma sa gabii. Gabii man ang kaon...” ni Catalina pa nga nagpahiyom. Mora’g duna siya’y gusto sa tambukikoy nga ulitawo.

Tuod, sa didto na sa balay nilang Catalina pagka-ugma sa gabii, grabeng busoga ni Tibur sa lamiang potahe nga giluto sa mga kusinero nilang Catalina. Naglid-ak sa kabusog si Tibur ug gidunolan si Tibur sa amahan ni Catalina og usa ka mahalong bino.

Miinom dayon si Tibur. “Wala lagi moy mga bisita, Tal, ako ra lagi. Wala diay ka mangimbitar sa imong mga higala sa eskuylahan ug sa imong mga paryente?”

“Layo man ang akong mga paryente, tua sa isla. Gusto namo nga ikaw maoy among espesyal nga bisita,” ni Catalina nga nagpahiyom.

Unya wala damhang nabuntagan si Tibur. Diha siya makatulog sa balay nilang Catalina. Unya nakurat siya sa nakita sa iyang lawas kay daghan kaayong mga balhibo sa iro nga nanurok libot sa tibuok niyang lawas. Diha si Catalina nga guwapa kaayong nagsul-ob sa nipis niyang sinina pangkatulog ug mipahiyom kini kang Tibur.

“Dinhi ka makatulog sa amo, Tibur, tungod sa imong kabusog,” ni Catalina. “Kuan diay, usa ka na ka iro karon,  kay gipainom ka namo’g bino alang sa patakod.

Pagka-Biyernes sa gabii si Tibur mipatil-is sa iyang uwang, samtang sila si Catalina miuwang usab dayon nanglakaw sila sum-ok sa mangitngit nga kagabhion. (Kataposan)