Kissamae ug ang gitarista - Gula 7

Nalingaw kaayo si Kissamae nga naminaw sa mga awit sa banda nila ni Brando. Giteksan niya ang higala nga si Fe aron moapas sa Casino apan wala kini maka-reply.

Pagkahuman sa oras nila ni Brando alang sa pag-awit, mibanos ang laing banda. Wala mouban si Brando sa iyang mga kauban sa grupo nga sagad unta niya nga himuon matag human nila og perform. Gusto ni Brando nga mag-uban pa sila si Kissamae. Migawas sila sa Casino ug didto sila sa lobby sa hotel. Nanglingkod sila si Brando ug Kissamae sa bakante nga lamesa ug naminaw sa mabugnaw nga mga awit. “Dili ka ba mahadlok Kiss nga may makakita kanato ug motug-an sa imong boyfriend?” gisukna ni Brando ang maanyag nga call center agent.

“Wala man ko’y steady karon Bran. Kun aduna pa dili g’yud unta ko mokuyog nimo,” abtik nga tubag ni Kissamae. Nahimuot sa hilom si Brando pagkadungog sa tubag sa dalaga apan kalit lang napasubo ang iyang panagway. “Anugon lang kay managlagyo ang atong pangedaron Kiss,” ni Brando.

Nagpatuso-tuso si Kissamae bisan og nakasabot siya nga pasakalye na kadto ni Brando aron manguyab. “Ngano diay Bran?” sa dalaga pa. “Kun managsama pa unta ang atong pangedaron Kiss, tingali manguyab unta ko nimo, apan tungod sa kalagyo sa atong pangedaron tingali kataw-an ra ko nimo kun akong himuon,” matud sa gitarista.

Tinukmod sa migitib na nga pagbati sa iyang dughan, wala kapugngi ni Kissamae ang pagpahiyom. “Wala may problema ang pangedaron kun ang duha ka binuhat magkasabot lang ug magkatagbo ang masi’g nila ka mga pagbati,” sa dalaga pa.

“Kun mao Kiss, dili ka masuko nga manguyab ko nimo? Ang tinuod Kiss, sa una ko pa lang pagkakita nimo, nabihag mo dayon ang akong kasing-kasing,” matud ni Brando. “Tam-is g’yud kaayo manulti ang usa ka gitarista no?” ni Kissamae pa.

Wala’y kukaulaw nga giangkon ni Kissamae  atubangan ni Brando nga sa hilom nakabatyag siya’g pagbati ngadto sa gitarista tungod sa iyang kabuotan ug sa iyang abilidad sa pagtugtog ginamit ang guitar. “Salamat kaayo Kiss. Sa ato pa, sugton ko nimo?” dayag kaayo ang kamaya ni Brando nga may tilimad-on na nga dili siya mapakyas sa iyang gihalad nga gugma kang Kissamae. Gikanta sa babaye nga singer ang Saving All My Love For You nga awit ni Whitney Houston.

“Gusto ko Kiss nga kini’ng maong awit, himoon nato nga theme song. Panahon nga mabati nato kini’ng kantaha, maghandumay kita sa usa’g-usa,” ni Brando.

Gihatud ni Brando si Kissamae sa pagpauli. Sa taksi, gipatikan ni Brando ug una’ng hawok sa lips si Kissamae. (Kataposan)