Tong-it dala tsismis

Uy, Perpekta maayo kay nakasuroy ka sa amoa. Mag-tong-it ta palabay sa oras ba,” agda nga dala ang kahinam ni Agata.

“Maoy tuyo ko kay laay sa balay ingon rong orasa,” ni Perpekta dayong saka ug lingkod sa hagdan.

Managhigala silang duha ug hilig sila sa sugal nga tong-it samtang mag-tabi ug libak sa ilang isigkatawo.

“Abi nimo Agata, nag tanga lang na si Berto sigeng panarbaho sa siyudad samtang iyang asawa dunay ka iring-iring,” ni Perpekta nga misugod na og saksak sa baraha.

“Saba ka diha oi, nganong kabalo ka man niana?,” pakisusi ni Agata.

“Ay da, nakahibalo ko kay duol ra mi’g balay,” ni Perpekta.

“Mao ba, oi ka silent mood ra gud diay anang Karya,” ni Agata.

“Ug kahibalo ka ba nga dihay gabii pud nga sa hilabihang husloka ni Berto kay hubog, misulod si Loloy sa kwarto nilang Karya ug gihuong tingale to og maayo si Karya!,” ni Perpekta nga maayo miyambi-yambi sa iyang baba. “Matay no, grabeng gubota kaha kun makahibalo si Berto niana,” nakapamulong si Agata.

Nagsige og libak ang duruha kutob sa dunay muagi nga ilang silingan, labi na kadtong mga dunay bitbit nga gikan og shopping ilaha dayon kining tutokan hangtod mawala kini sa ilang panan-aw.

“Da naka-shopping to silang mare Ester duna may Amerkano ilang anak, sus kung wala pa sad asa sila maka-shopping shopping...”, pulong ni Perpekta nga klaro nga nasina.

Misawop na ang adlaw, mihinay-hinay na og uli si Perpekta. Pag-abot niya sa ilaha, naabtan niya si Enting nga nanampiling.

“Hoy, Enting wala ka ba diay magdigamo sa atong panihapon,” sukna ni Perpekta.

“Unsa may lung-agon nga wala may bugas?, babayeng buhat ka man unta magsige ka man lang og panumbay ug mag tong-it,” ni Enting.

“Mag-unsa man diay ko diri anang mga orasa sa alas dos hangtud hapon? Magmika ko ug matog?,” ni Perpekta.

“Unya unsa may lung-agon nato ron nga wala man mi gipa bale sa among amo ganina?!, pinabundak ang tingog ni Enting.

“Ha???, na unsaon ta man na ron pwerti na ra ba nakong gutoma Ting!”, ni Perpekta nga milingkod duol sa ilang lamesa.

“Suma nimo, kung ang imong gi-tong it dalang tsismis didto sa imong pagpanumbay ug gipalit pa to nimo og kaon, dili ka unta magbagulbol ron maayo pag mo hunong ka na nianang bisyoha samtang sayo pa,” pahimangno ni Enting ngadto sa iyang asawa.

Dala sa kagutom ni Perpekta, dinhi mituhop sa iyang tanlag ang gipamulong sa iyang bana kaniya. Nakahinuktok siya.  (Kataposan)